Bos jumys oryndaryn jasyrǵan mektep direktorlary jaýapkershilikke tartylady. Bul týraly Oqý-aǵartý ministrliginiń apparat jinalysynda vedomstvo basshysy Ashat Aimaǵambetov málimdedi, dep habarlaidy Ulysmedia.kz.
«Bizde mektepte bar kóptegen bos oryndy direktorlar kórsetpeidi. Ony biz jaqsy bilemiz. Jasyryp ustaidy. Tarifikatsiia jasaǵan kezde oryn bar dep kórsetip qoiady. Biraq zań bekitkendei, tiisti organdarǵa, eńbekpen qamtý organdaryna kórsetpeidi. Eshkimge ashyq aitpaisyzdar. Qyrkúiek aiy ótkennen keiin, biraz ýaqyttan soń «adam kelmedi, muǵalim tappadyq» dep, sol bar saǵattardy ishtegi jumys istep júrgen muǵalimderge bólip beresizder. Bul - zańsyzdyq. Mundaiǵa zańmen kózdelgen jaýapkershilik, onyń ishinde ákimshilik te jaýapkershilik bar. Ol bos saǵatty bólgen kezde de táýekel kóp jáne obektivti jumys júrmeidi. Ony da bilemiz», - dedi ministr.
Aimaǵambetovtiń aitýynsha, mektepterde 1,5-2 stavkamen jumys isteitin muǵalimder az emes.
«Sonda qazaq tili bolsyn, matematika bolsyn, 1 stavkany, 16 saǵatty bes adamǵa bólip berýge bolady. Bir synypta matematikany ótkizgen kezde eki ne úsh muǵalim óte me? Mundai zańsyzdyqqa qalai barýǵa bolady? Birneshe oblysta 1,5-2 stavkamen jumys isteitin adam kóp eken. Bir jaǵynan qarasaq, 40-50 paiyzy 1 stavkadan artyq júktememen otyr, onyń ishinde 10-20 paiyzynda tipti júkteme joq. muny qalai túsinýge bolady? Jumysqa adamdardy biz bekitken tártipti buzyp alatyndar bolsa, onda jaýapkershilikke tartamyz. Maqsat - mektepterdi bilimdi, bilikti pedagogtermen qamtamasyz etý. Muǵalimderdi ashyq ári ádil konkýrs arqyly jumys alýymyz kerek», - dedi ministr.
