Bilim jáne ǵylym ministri Ashat Aimaǵambetov pedagogterdiń biliktiligin arttyrý isinde basym baǵyttar jańartylatynyn málim etti, dep habarlaidy QazAqparat.
«Biliktilikti arttyý jumysyndaǵy basymdyqtardy ózgertý kerek. Bul aidan anyq. Birinshiden, sońǵy jyldary pán boiynsha kýrstar óte az ótkizildi. Kóbinese biz ádisteme boiynsha, basqa kýrstardy ótkizdik. Biraq pán boiynsha kýrstar óte az ótkizildi. Sondyqtan qazir bizden pedagogter pán boiynsha kýrstar ótkizýimizdi surap otyr», - dedi ministr vedomstvonyń apparat májilisinde.
Sondai-aq, Ashat Aimaǵambetov biliktilikti arttyrý baǵdarlamasyn jańartyp otyrý kerektigin eskertti.
«5 jylda bir ret qana ótkiziletin aqysyz kýrstarmen muǵalimderdi tolyq qamti almai otyrmyz. Sondyqtan bul máseleni de sheshýimiz kerek. Jańa ǵana áriptesterimiz aitty, baǵdarlamalardy tolyǵymen jańartý kerek. Bir baǵdarlamamen birneshe jyl jumys isteýge bolmaidy. Onlain tizilimdi qalyptastyryp, barlyq baǵdarlamalardy ornalastyrý qajet. Ol muǵalimderge de jalpy qoǵamǵa da qoljetimdi bolýy kerek. Neni úiretip jatqanymyzdy, qandai baǵdarlamalarmen úirenip jatqanymyzdy bilýge múmkindik bolýy tiis», - dedi vedomstvo basshysy.
Ministr qashyqtan oqytý boiynsha jinalǵan tájiribeni biliktilikti arttyrý isinde paidalanýǵa bolatynyn aitady.
«Pandemiia jaǵdaiynda bul tásilge beiimdelip qaldyq. Keibir kýrstardy múmkindiginshe qashyqtan ótkizý óte mańyzdy. Kýrs ótkennen keiin de pedagogterge qoldaý kórsetý qajet. Direktorlarǵa arnalǵan jáne tsifrlyq saýattylyqty arttyrý úshin arnaiy kýrstardy júrgizý boiynsha tapsyrma berdik. Osy jumysty da belsendi júrgizýimiz kerek», - dedi jiyndy qorytyndylaǵan Ashat Aimaǵambetov.
