Almaty oblysynyń Qarasai aýdandyq soty "áieldi zorlamaq boldy" dep aiyptalǵan ("Zorlaý" jáne "Qylmysqa oqtalý" baptary) ulttyq qaýipsizdik komitetiniń burynǵy qyzmetkerin 9 jylǵa bas bostandyǵynan aiyrdy. Bul týraly advokat Janna Mýhamadi Facebook paraqshasynda habarlady, dep jazady Azattyq.
"Tergeý kezindegi qysymǵa qaramastan (jábirlenýshi) Aiia jiger kórsetip, búgin ádil úkim shyqty" dep jazdy advokat.
Sot aiyptalýshyny kapitan ataǵynan da aiyrǵan.
Aqparatqa qaraǵanda aiyptalýshynyń aty-jóni – Sabyrjan Narynbaev. 1989 jyly týǵan. Buryn ol Almaty oblysynyń ulttyq qaýipsizdik departamentinde jedel ýákil retinde jumys istegen.
Sot úkimi áli kúshine enbegen.
Jábirlenýshi Almaty oblysynyń turǵyny Aiia Ómirzaqova Orda.kz saityna bergen suhbatynda oqiǵa 2020 jyly qyrkúiek aiynda bolǵanyn aitqan. Aqparatqa qaraǵanda, ol jigitimen urysyp qalyp, kóshede jalǵyz ózi jylaǵan. Oǵan beitanys er adam kelip, janashyrlyq keiip tanytyp, úiine jetkizip tastaitynyn aitqan.
"Ol dini ýaǵyzdar aityp, qiyn kezde kómekten bas tartýǵa bolmaitynyn jetkizdi" dedi jábirlenýshi. Budan soń qyz kelisip, kólikke otyrǵan. Al júrgizýshi jurt sirek júretin jerge aparyp, qyzdy "uryp-soǵyp, zorlaýǵa tyrysqan".
Aiia Ómirzaqova odan qashyp qutylǵanyn aitady.
"Ol kólikten shyǵyp, júksalǵyshty ashty. Ne alǵysy kelgenin bilmeimin. Osy sátti paidalanyp, qashyp shyqtym. Ol qýdy. Meni qýyp jetip, ura bastady. Shashymnan súirep, kólikke qaitadan aparmaq boldy. Men aiǵailadym, ol meniń aýzymdy jabýǵa tyrysty. Men jerden bir ýys topyraq alyp, oǵan qarai shashtym. Osy kezde ol meni birden bosata saldy. Biz jaqqa qarai bir kóliktiń kele jatqanyn kórdim. Ol sony kóre sala óziniń kóligine otyryp, qashyp ketti" dedi ol suhbatta.
