Foto: Ashyq derekkóz
Abai oblysynyń Aiagóz qalasynda merzimdi qyzmettegi sarbazdyń ólimine qatysty is boiynsha sot úkimi shyqty, dep habarlaidy Ult.kz.
Meningitten qaitys bolǵan 20 jastaǵy áskeri qyzmetshiniń isinde gospital dárigeri kináli dep tanylyp, 2 jylǵa sottaldy. Alaida ol raqymshylyqqa iligip, jazadan bosatyldy.
Sarbaz 16 mamyrda densaýlyǵy nasharlap, áskeri gospitalǵa túsken. Dáriger bastapqyda oǵan jeńil diagnoz qoiyp, der kezinde qajetti em júrgizbegen. Naýqas kesh jetkizilgen aýrýhanada jansaqtaý bóliminde kóz jumdy.
Saraptama ólimniń sebebi irińdi meningit ekenin kórsetti. Mamandardyń aitýynsha, der kezinde durys diagnoz qoiylǵanda, sarbazdy aman alyp qalýǵa bolar edi.
Sot dárigerdi kásibi mindetin tiisinshe oryndamaǵany úshin kináli dep tanydy. Sondai-aq marqumnyń otbasyna 12 million teńgeden astam ótemaqy tóleý mindetteldi.
