Búgin Qazaqstan politsiiasy kúnine orai elorda ákimi Altai Kólginov qalalyq Politsiia departamentine jańa qyzmettik kólikterdiń kiltin tabystady, dep habarlaidy "Ult aqparat".
Nur-Sultan qalalyq Politsiia departamenti baspasóz qyzmetinen málim etkendei, vedomstvo parki elimizde qurastyrylǵan «Hyundai Elantra» jáne «Hyundai Tucson» markaly 30 avtokólikpen tolyqty. Jyl sońyna deiin taǵy 11 avtokólik tapsyrylady. Máselen, ótken jyly ǵana elordalyq politsiia avtoparki 65 jańa mashinamen tolyqqan bolatyn. Qyzmettik avtokólikter patrýldik politsiia polkine, mamandandyrylǵan batalonǵa jáne ýchaskelik politsiia inspektorlaryna berildi.
«Qurmetti politsiia qyzmetkerleri, sizderdi kásibi merekelerińizben shyn júrekten quttyqtaimyn! Sizderge qala turǵyndarynyń tynyshtyǵy men qaýipsizdigin, kóshelerdegi tártipti qamtamasyz etýmen bailanysty úlken jaýapkershilik júkteledi. Búginge deiin myńdaǵan adamnyń ómirin qaýipten arashalap qaldyńyzdar!
Pandemiia kezinde de aldyńǵy shepte eńbek ettińizder: kúzet beketterinde kezekshilikte bolyp, qalanyń úzdiksiz jumysyn qamtamasyz ettińizder. Monitoringilik toptardyń quramynda bolyp, sanitarlyq talaptardyń buzylýynyń aldyn alyp, koronavirýstyń taralmaýyna baǵa jetpes úles qosyp kelesizder.
El basshylyǵynyń tapsyrmasy boiynsha sizderge qolaily jaǵdailar jasaý úshin jumys isteimiz», - dedi elorda ákimi Altai Kólginov.
Sonymen qatar, qyzmettik mindetterin adal atqarǵan jáne erekshe kózge túsken politsiia qyzmetkerlerine qala basshysy alǵyshattar tabys etti. Olardyń arasynda ýchaskelik politsiia inspektorlary, patrýldik politseiler, tergeýshiler men anyqtaýshylar bar.
