Foto: muftyat.kz
Qazaqstan musylmandary dini basqarmasynyń Tóraǵasy, Bas múfti Naýryzbai qajy Taǵanuly qasietti Ramazan aiynyń mańyzy týraly aitty, dep habarlaidy Ult.kz múftiiattyń resmi saityna silteme jasap.
"Ramazan aiynda musylman nápsisin tyia otyryp, az iship-jeýge daǵdylanady, túnin qulshylyqpen jandandyryp, taraýyq pen táhájýd namazdaryna kóńil bóledi. Sondai-aq aýzy berik jan artyq sózden saqtanyp, sabyr men ustamdylyqqa úirenedi. Sonymen qatar aýyz bekitý men ony ashýǵa qatysty halqymyzdyń "sáresi" men "aýyzashar" degen tól ataýlardy qoldanýy – qazaqy bolmysymyzǵa tán qundylyq", – dedi Naýryzbai qajy Taǵanuly 24KZ telearnasyna bergen suhbatynda.
QMDB tóraǵasy burynnan beri "iftar" emes, "sáresi" degen sóz qoldanylǵanyn aitty.
"Biz bala kezimizden oraza ustadyq. Sol kezde "iftar" degen sózdi bilmedik. Sáresine turý – saýapty is. Sáresin ájemizben birge ishý, áli kúnge deiin esimizden ketpeitin tary qosylǵan shai, sút qatqan talqan – osylardyń barlyǵyn bizge kezinde ájelerimiz, analarymyz úiretken. Osy dúnieni qazir jalǵastyrýdy da qolǵa alyp jatyrmyz. Sondai-aq aýyzashar ýaqytyn qazir "iftar" dep ketken ǵoi. "Iftar" degen arabtyń sózi. Degenmen biz ózimiz qazaqshalap, jalpy halyq túsinetin, qulaǵymyzǵa jaǵymdy sózdermen "aýyzashar" dep ataǵanymyz áldeqaida jaqsy", – dedi QMDB basshysy.
Naýryzbai qajy Taǵanuly aýyzashardyń da óz ádebi bar ekenin jetkizdi.
"Ár elde aýyzashar ártúrli bolady. Bizdiń eldegi tártip ata-babamyzdan kele jatyr. Aýyzashar ýaqytynda azan aitylady. Bizdiń ata-babalarymyz ony tyńdap alyp, duǵasyn, aýyzashardyń batasyn jasap, Allaǵa shúkir etip aýyz ashady", – dedi ol.
