Aýyr atletikadan Qazaqstan ulttyq quramasynyń bas bapkeri aýysty. Iýrii Melnikovtyń ornyna Baqyt Ahmetov keldi, dep habarlaidy "Ult aqparat" QR aýyr atletika federatsiiasynyń baspasóz qyzmetine silteme jasap.
Baqyt Ahmetov - burynnan belgili qazaqstandyq aýyr atlet. 2004 jyly Aziia chempiony, 2007 jyly Aziia chempionatynyń qola júldegeri, 2002 jyly Aziia oiyndarynyń chempiony jáne 2006 jyly Aziia oiyndarynyń qola júldegeri bolǵan. 2008 jyly Qytaida ótken Jazǵy Olimpiada oiyndarynda Qazaqstannyń Týyn kóterip shyqqan. Onyń basshylyǵymen 2009 jyldan bastap jasóspirimder men jastar quramasy halyqaralyq arenada joǵary sporttyq nátije kórsetken. Baqyt Beshimbekulynyń shákirtteri ulttyq quramanyń sapynda da bar. Jazira Japparqul, Aleksandr Zaichikov, Karina Goricheva, Albert Linder jáne Igor Son siiaqty sportshylardy Baqyt Ahmetov tárbielegen.
«Qazir ulttyq qurama jańǵyrý kezeńin ótkerýde. Osy jyldan bastap eresekter quramasynyń quramyna jastardan Rahat Bekbolat, Nurǵis Ádiletuly, Saihan Taisýev, Sairamkez Aqmolda, Karina Quzǵanbaeva, Daria Ahmerova jáne Gúlnur Ybyrai endi. Baqyt Ahmetovtyń úilestirýimen komandany nyǵaitý josparlanyp otyr. Biz Baqyt Beshimbekulyn tájiribeli jas jattyqtyrýshy jáne kásibi menedjer retinde bilemiz. Osyǵan orai ony eresekter quramasyna aýystyrý týraly sheshim qabyldandy. Iýrii Aleksandrovichke kóp rahmet. Ol ulttyq quramany qiyn kezeńde basqardy. Onyń basshylyǵymen bizdiń sportshylar joǵary nátijege jetti», - dedi aýyr atletika federatsiiasynyń atqarýshy direktory Aldiiar Nuralinov.
Eske sala ketsek Iýrii Melnikov ulttyq quramany 2016 jyldan beri jatttyqtyrǵan.
