Almaty oblysynyń Jambyl aýdanyndaǵy Uzynaǵash aýyly orta mektebiniń matematika páni muǵalimi Gúlziia Qumanqanǵa «Bolashaq» halyqaralyq stipendiiasy taǵaiyndaldy, dep habarlaidy QazAqparat.
«Halyqaralyq baǵdarlamalar ortalyǵy» AQ baspasóz qyzmetiniń málimetterine qaraǵanda, Gúlziia AQSh-tyń jetekshi joǵary oqý orny – Ońtústik Florida ýniversitetinde «Matematikalyq bilim berý» mamandyǵy boiynsha magistratýrada oqidy.
Pedagog internet jelisindegi onlain sabaqtar men dáristerdiń kómegimen aǵylshyn tilin bastapqy deńgeiden joǵary deńgeige deiin meńgerdi. Gúlziia shet tilin kúnine 5-6 saǵat boiy oqydy. Osynyń arqasynda ol IELTS emtihany boiynsha 9 joǵary baldan 7 ball jinap, AQSh-tyń eń bedeldi joǵary oqý ornyna tústi.
«Men aýyldan shyqpai-aq, «Bolashaq» stipendiiasyn taǵaiyndaýǵa konkýrstyq irikteýden sátti óttim. Qarapaiym aýyl mektebinde oqydym, qazir sol aýyl mektebinde jumys isteimin. Álemdegi eń úzdik ýniversitette oqýǵa múmkindigim bolatynyn tipti elestete de almadym. Bilim men ózińe degen senim árqashan qalaǵan nárseńe jetýge kómektesetinine senimdimin. Shákirtterim de álemdegi eń úzdik bilim alǵanyn qalaimyn. Olar menen úlgi alyp, shabyttanady dep úmittenemin», - dep áńgimeledi Gúlziia Qurmanqan.
Esterińizge sala keteiik, Kadrlardy shetelde daiarlaý jónindegi respýblikalyq komissiia sheshimimen 2022 jylǵy alǵashqy aǵynynda stipendiia 199 qazaqstandyqqa taǵaiyndaldy. Olardyń ishinde 29 stipendiia pedagogter men oqytýshylarǵa taǵaiyndaldy.
Jalpy alǵanda, biyl magistratýra men rezidentýra baǵdarlamalaryna 385 stipendiia, doktorantýra baǵdarlamasyna 60 stipendiia bólindi.
Osy jyldyń sońyna deiin Respýblikalyq komissiianyń taǵy eki otyrysy ótedi. «Bolashaq» halyqaralyq stipendiiasyn taǵaiyndaýǵa konkýrstyq irikteýge qatysý úshin qujattar biylǵy jylǵy 14 qazanǵa deiin qabyldanady. Taǵylymdamadan ótý úshin qujattar qabyldaý 2022 jylǵy 5 qyrkúiekte bastalyp, 14 qazanǵa deiin ótedi.
