Ustazdar kúni qarsańynda Nursultan Nazarbaev Qory Elbasynyń «El úmiti» bastamasynyń jobalarynda joǵary nátijeler kórsetken aýyl mektepterin quttyqtady, dep habarlaidy QazAqparat.
Birinshi 2 million teńgeniń qarjylai sertifikatyn Qyzylorda oblysynyń Qazaly aýdanynda ornalasqan Erjigit Bozǵulov atyndaǵy №249 mektep-litseiine tabys etildi. Bul mektep aýyl oqýshylaryna arnalǵan «Myń bala» Ulttyq ziiatkerlik olimpiadasynda úzdik nátijeler kórsetti. Jobaǵa qatysqan 4 myńnan astam mekteptiń ishinde oqý orny úzdikter qatarynda boldy. Olimpiadanyń qorytyndysy boiynsha mektepte 66 finalist jáne 21 jeńimpaz anyqtaldy.
«Myń bala» olimpiadasy osymen ekinshi jyl ótkizilip otyr. Osy ýaqyt ishinde jobaǵa 450 myńnan astam aýyl oqýshysy qatysyp úlgerdi. Olimpiadanyń nátijeleri boiynsha 2000 oqýshy, aýyl mektepteriniń 5-6 synyptarynyń jeńimpazdary Respýblikalyq fizika-matematika mektebi, «Bilim-Innovatsiia» litseileri, «Daryn» mamandandyrylǵan mektepteri siiaqty elimizdiń jetekshi mektepterinde oqýǵa, sondai-aq Elbasy akademiiasynyń «Birge oqý» onlain mektebinde pándik daiyndyqtan ótýge múmkindik aldy.
Ekinshi aqshalai sertifikatty Soltústik Qazaqstan oblysy Aqqaiyń aýdanynyń №1 Smirnov orta mektebi aldy. «Elbasy medali» jobasyn iske asyrý sheńberinde neǵurlym belsendi aýyl mektepterine taldaý júrgizilip, olardyń ishinde №1 Smirnov orta mektebinde Elbasy medaldarynyń eń kóp iegerleri anyqtaldy. Atalǵan mekteptiń 12 oqýshysy baǵdarlamany 7 baǵyt boiynsha aiaqtap, qola medalǵa ie boldy.
Soltústik Qazaqstan oblysy boiynsha barlyǵy 292 qatysýshy qola medal jeńip aldy. Qazirgi ýaqytta óńir boiynsha «Elbasy medali» jobasynyń baǵdarlamasyna 404 jas qatysty.
Jalpy, eki jyl ishinde «Elbasy medali» jobasy búkil el boiynsha 7 baǵytta damyp kele jatqan 20 myńnan astam qatysýshyny qamtydy. Olar: sport, talanttar men daǵdylar, kitap oqý, ulttyq mura, volonterlik, ekspeditsiialar men joryqtar, eńbek tájiribesi. Biyl «Elbasy medaliniń» 605 iegeri granttar alyp, elimizdiń jetekshi joǵary oqý oryndaryna tústi. Olardyń 30% - dan astamy-aýyl mektepteriniń túlekteri (UBT upailary teń bolǵan jaǵdaida, jobaǵa qatysýshylarǵa bilim granttaryn alýǵa basymdyq beriledi).
Óz kezeginde, «El Úmiti» bastamasynyń jobalaryn uiymdastyrýshylar Nursultan Nazarbaev Qory men «Elbasy Akademiiasy» KQ elimizdiń barlyq ustazdaryn kásibi merekemen quttyqtap, bolashaq urpaqty tárbieleý jolynda tabys tileidi.
