Ulybritaniia, AQSh jáne Germaniia Úndistanǵa tez arada kómek kórsetetinin málimdedi. Úndistanda koronavirýs boiynsha tórt kún qatarynan buryn-sońdy bolmaǵan kórsetkish tirkelip jatyr.
25 sáýirde munda 349 691 adamnan koronavirýs anyqtalǵan. Sarapshylar virýs kúsheigen tusta eldiń densaýlyq saqtaý júiesi kúireýge shaq tur dep eskertedi.
Baspasóz quraldarynyń jazýynsha, aýrýhanalar naýqastardy qabyldap úlgermei jatyr. Naýqastar dáriger aldynda saǵattap kezekte turýǵa májbúr. Keibir adamdar sol kezekte turyp, kóz jumyp jatyr. Dárigerler hali óte aýyr adamdardy aman alyp qalý úshin naýqastardy tolyq emdemei shyǵarýǵa kóshti. Aýrýhanalarda ottegi jetpeidi. Zirattar men krematoriiler tolyp ketken.
Ulybritaniia, AQSh, Germaniia jáne Eýroodaq Úndistanǵa jasandy tynys apparattary men ottegi ballondaryn jiberýge ýáde berdi. Britandyq keńse Niý-Delige shamamen 140 tynys apparaty men 500-ge jýyq ottegi ballondaryn jibergen. Olar 27 sáýirde jetýi tiis.
AQSh jasandy tynys apparattary men ózge de qajetti zattarmen birge koronavirýsqa qarsy vaktsina óndirýge qajet jabdyqtardy da jiberedi. Bul týraly AQSh ulttyq qaýipsizdik boiynsha keńesshisi Djeik Sallivan habarlady. Germaniia kantsleri Angela Merkel "koronavirýspen kúres – ortaq soǵys" dep málimdep, Germaniianyń tez arada qoldaý missiiasyn jasaqtaitynyn aitty.
Eýropa komissiiasy Niý-Deliden suraý túskennen keiin Úndistanǵa ottegi men dári-dármek jibermekshi.
