Jeksenbi kúni «Taliban» qozǵalysy Tájikstanmen shekarada ornalasqan Tahar provintsiiasynyń ákimshilik ortalyǵy – Talýkan qalasyn basyp alǵandyǵy jóninde málimdedi. Bul týraly «Anadoly» agenttigi habarlady.
Agenttikke Tahar provintsiiasynyń zańnamalyq organy tóraǵasynyń orynbasary Rýholla Raýfi málim etkendei, qaýipsizdik kúshteriniń qyzmetkerleri men jergilikti bilik ókilderi Farhar ýezine kóshken. Onyń aitýynsha, tálibter barlyq qoǵamdyq oryndarǵa basa kóktep kirgen. Sondai-aq jergilikti túrmeden sottalǵandardy bosatqan.
Raýfidiń sózinshe, sodyrlar Talýkanǵa shabýyl jasai bastaǵanyna eki aptaǵa jýyqtaǵan.
«Taliban» qozǵalysynyń málimetine sáikes, olar Talýkandaǵy barlyq qoǵamdyq ǵimaratty óz qaramaǵyna alǵan. Osylaisha, «Taliban» basyp alǵan Aýǵan provintsiialarynyń ákimshilik ortalyqtarynyń sany 5-ke jetti. Buǵan deiin olar Sari-Pýl jáne Kýndýz provintsiialarynyń ákimshilik ortalyqtaryn basyp alǵan bolatyn. Al bir kún buryn tálibter eldiń soltústigindegi Djýzkan provintsiiasynyń astanasy – Shibirgan qalasyna kirdi.
«Taliban» qozǵalysy Aýǵanstan aýmaǵynyń 80 paiyzyn baqylaýǵa alǵanyn aitýda.
BUU málimetinshe, sońǵy bir aida tálibterdiń shabýyly saldarynan Aýǵanstannyń 1 myńnan astam beibit halqy qaza boldy.
