Aýǵan soǵysy men Chernobyl atom elektr stansasyndaǵy apatty joiýǵa qatysqandarǵa áleýmettik kómek kólemi ulǵaitylmaq. Bul jaiynda Nur-Sultan qalalyq Jumyspen qamtý jáne áleýmettik qorǵaý basqarmasy basshysynyń orynbasary Baqtiiar Garifýllin aitty, dep habarlaidy QazAqparat.
«Aýǵanstan aýmaǵyndaǵy soǵys is-qimyldary ardagerleri men Chernobyl atom elektr stansasyndaǵy apat saldaryn joiýǵa qatysqan tulǵalarǵa áleýmettik qoldaý is-sharalaryn arttyrý maqsatynda ataýly kúnder men merekelik datalarda olarǵa beriletin áleýmettik kómektiń mólsherin 35 ailyq eseptik kórsetkishke (1 AEK - 2917 teńge) deiin ulǵaitý usynylady. Búginde olar 9 AEK alady», - dedi ol qalalyq qoǵamdyq keńes otyrysynda.
Onyń atap ótýinshe, atalǵan áleýmettik kómek jańa mólsherde júzege asyrylǵan jaǵdaida qalalyq biýdjetten 181 mln teńge qajet bolady.
«Bul maqsatty kelesi jyldan bastap júzege asyrý kózdelip otyr», - dedi Baqtiiar Garifýllin.
