QR Indýstriia jáne infraqurylymdyq damý ministri Beibit Atamqulov áýe biletiniń qunyn qaitara almai júrgen turǵyndardyń suraǵyna jaýap berdi, dep habarlaidy "Ult aqparat".
«Áýe kompaniialaryna TJ kezinde toqtatylǵan reisterdiń bilet qunyn aiyppulsyz, tolyq kólemde qaitarý týraly tapsyrma berildi, mindetteldi. Bir aita keterligi, bizde agregator kompaniialar (Aviata, tickets.kz) arqyly da kóp bilet satylǵan. Olar derbes jumys isteidi jáne agregatorlardyń bir bóligi ózge memleketter aýmaǵynda ornalasqan. Bul da bizge qiyndyq týdyryp jatyr. Kei týristik agenttikter sheteldegi keńselerin satyp jatyr. Munda árine, qaitarý máselelerin azamattyq-quqyqtyq alańda sot organdary arqyly sheshý qajet», - dedi spiker Ortalyq kommýnikatsiialar qyzmetinde ótken esep berý brifinginde.
Sonymen birge, ministr KVI pandemiiasynda áýe kompaniialarynyń da sharýasy qiyndaǵanyn aitty.
«Olar bilet qunyn tolyq kólemde, aiyppulsyz qaitarýy kerek nemese biletti alda ushatyn reisterge aýystyrýy tiis. Bizdiń azamattar da aviatsiia salasynyń úlken soqqy alǵanyn túsinýi kerek. Biz 99 baǵyt boiynsha 450 reisti toqtattyq. Áýe kompaniialarynyń óz qyzmetkerleri bar, eńbekaqy tóleý, ushaq turaǵyn tóleýmen qatar aýqymdy qarjylyq shyǵynǵa ushyrady. Bul – tek Qazaqstanda emes, kóptegen elderde bolyp jatqan úrdis. Muny da túsiný kerek. Osy aralyqqa satylǵan biletter boiynsha kún saiyn qaitarý týraly myńdaǵan ótinishter kelip túsedi. Bul jumystar jalǵasýda», - dedi B. Atamqulov.
Buǵan deiin ministr Qazaqstanda halyqaralyq reisterdiń kezeń-kezeńimen ashylatynyn aityp, ruqsat berilgen alǵashqy memleketter tizimin jariialady.
