Atyraýda jyl basynan 19 tutynýshyǵa 1 mln-nan astam teńgesi qaitarylǵan, dep habarlaidy "Ult aqparat".
Atyraý oblystyq Tutynýshylardyń quqyqtaryn qorǵaý departamentiniń basshysy Álem Ýálievtiń málim etýinshe, jyl basynan beri 30 tutynýshy konsýltativtik keńes alǵan. Al, 27 tutynýshy telefon jelisi arqyly habarlasqan.
«Bizdiń departamentke osy kezge deiin 98 aryz tústi. Onyń ishinde 63 aryzǵa qatysty túsindirý jumysy júrgizildi. Al, 19 aryzǵa tolyqtai jaýap berilip, tutynýshylarǵa 1 147 570 teńge keri qaitaryldy. Sondai-aq, 16 aryz boiynsha kóterilgen máselelerdi sheshý departamenttiń quzyretine jatpaityndyqtan, tiisti quzyrly organdarǵa joldandy. Qazir tutynýshylardyń quqyqtaryn qorǵaý úshin áleýmettik jelilerde paraqshalar ashylyp, bailanys telefony iske qosyldy», - dedi Álem Ýáliev.
