Internatýra jáne rezidentýra bitirip kelgen 55 maman Atyraý qalasyndaǵy jáne aýdandardaǵy emdeý mekemelerine jumysqa kiristi, dep habarlaidy Atyraý oblystyq kommýnikatsiialar qyzmeti.
Jas mamandarmen kezdesý barysynda aimaq basshysy Mahambet Dosmuhambetov meditsina salasynyń aýyr kezeńdi bastan ótkerip jatqandyǵyn atap ótti.
«Qazirgi ýaqytta oblysta 9000 dáriger bolsa, onyń ishinde 2000 meditsina mamany pandemiiamen kúreske jumyldyrylyp otyr. Onyń ústine óńirde 278 dáriger jetpeidi. Búgingi tańda Jylyoi, Qurmanǵazy aýdandarynda aýrýhanalar salynýda. Sonymen birge, Atyraý kardioortalyǵyna japsarlas ǵimarat ashylady. Meditsina jáne bilim salasy mamandaryn daiyndaýǵa qashan da basymdyq beremiz»,- degen Atyraý oblysynyń ákimi Mahambet Dosmuhambetov jas mamandardy áleýmettik qoldaý jalǵasatynyn aitty.
Atyraý oblysy densaýlyq saqtaý basqarmasynyń basshysy Nurlybek Qabdyqaparov buǵan deiin habarlaǵandai, aimaqqa jalpy sany 122 jas maman keledi. Qazirgi kezde olardyń aldy jumysqa kirisip ketken.
«Koronavirýs indetine bailanysty, jas mamandardan qosymsha kómek bolady dep kútilýde. Mamandardyń jalaqysy zań sheńberinde kórsetilgen deńgeide tólenedi. Eger infektsiialyq nemese provizorlyq statsionarǵa jumysqa kirisse, ministrlik buiryǵyna sáikes ústemeaqy bólinedi. Emdeý mekemeleri basshylarynan túsken suranysqa sai mamandar úimen qamtamasyz etiledi»,- deidi Atyraý oblysynyń densaýlyq saqtaý basqarmasynyń basshysy Nurlybek Qabdyqaparov.
Nasyr men Albina Ońǵarbaevtar - qyzyl aimaqta jumys istep jatqan otbasylyq jup. Dárigerlikti tańdaǵan jas mamandar - Aqtóbeniń týmasy.
«Jumysqa 20 shilde kúni kiristik. Atyraý oblystyq aýrýhanasy janyndaǵy provizorlyq statsionardamyz. Naýqastardy qabyldap, jaǵdaiyn baqylaimyz. Aýrýyna qatysty qujattar toltyramyz. Qazirgi ýaqytta oblystyq ákimdik jaldap bergen «Dostyq» qonaq úiinde turamyz. Aýrýhanaǵa avtobýs tasymaly uiymdastyrylǵan. Búginde ahýal turaqtalyp, naýqastar sany azaiýda. Dese de, osyndai qiyn jaǵdaida halyqqa kómek kórsetip jatqanymyzǵa qýanyshtymyz», - deidi Nasyr men Albina Ońǵarbaevtar.
Oblystyq aýrýhananyń provizorlyq aýrýhanasynda jumys istep jatqan taǵy bir maman - Dmitrii Li. Hirýrg mamandyǵyn bitirgen Dmitrii Li jataqhanaǵa ornalasqanyn aitady.
«Úsh mezgil as-aýqatpen, qajetti qorǵanys kiim-keshekpen qamtamasyz etti. Tájiribemiz bolmaǵandyqtan tálimgerlermen keńese otyryp, em-sharasyn taǵaiyndaimyz»,- deidi Dmitrii Li.
Aita ketelik, qazirgi ýaqytta Aqtóbe meditsinalyq akademiiasyn támamdaǵan 53 mamannyń 11-i statsionarlyq aýrýhanaǵa, 27-si bastapqy meditsinalyq kómek kórsetetin emhanalarǵa jumysqa kiristi.
Qalǵan 15 maman aýdandarǵa jiberildi.
