Foto: azh.kz
Atyraýda 15 jastaǵy oqýshy Injýmarjan Qýanyshqyzyna izdeý jariialandy. Bul týraly Aq Jaiyq basylymy habarlady.
Qyzdyń anasy onyń joǵalýyn mektep ákimshiligimen bolǵan janjalmen bailanystyrady. Anasynyń aitýynsha, oqý jylynyń basynda qyzyn jańa mektepke aýystyrǵan. Alaida kóp uzamai oqýshy men direktordyń tárbie isi jónindegi orynbasary arasynda túsinispeýshilik týyndaǵan. Áieldiń sózinshe, keiin synyp ishinde qyzyna qarsy túsinikteme jinaý bastalǵan. Osy jaǵdaiǵa bailanysty ol e-Otinish portaly arqyly resmi shaǵym túsirgen.
«Qyzyma direktordyń orynbasary tarapynan qysym jasaldy. Synyptastaryn oǵan qarsy túsinikteme jazýǵa májbúrledi. Keiin qujattaryn alyp ketýge itermeledi», – deidi anasy.
19 aqpanda mektepten qońyraý túsken, alaida anasy jumys ornynda bolǵandyqtan jaýap bere almaǵan. Kelesi kúni mektepke barǵanda oǵan oqýshylardyń jazbasha túsiniktemeleri kórsetilip, qyzynyń qujattaryn alý qajettigi aitylǵan.
Osydan keiin qyz úiine kelgen. Alaida biraz ýaqyttan soń páterden qaita shyǵyp ketip, sodan beri oralmaǵan. Qazirgi ýaqytta kámeletke tolmaǵan jasóspirimge izdeý jariialanyp, ony politsiia izdestirip jatyr.
Basylym málimetinshe, 10 «P» synybynyń ata-analary da direktordyń orynbasarynyń jumys tásilderin tekserýdi surap, ujymdyq ótinish joldaǵan. Ótinishte oqýshylardan ártúrli sebeptermen túsinikteme jazdyrý, synypty taratý týraly eskertý jasaý, balalardyń telefondaryn sabaq boiy alyp qoiý jáne másele talqylanǵan kezde ata-analar chatyn jabý derekteri kórsetilgen.
