Foto: Atyraý bilim basqarmasy
Atyraýda mektep túlegi Jazira Keńesova naýryz aiyndaǵy Ulttyq biryńǵai testileýde barlyq suraqqa durys jaýap berip, eń joǵary 140 ball jinady, dep habarlaidy Ult.kz Kazinform-ǵa silteme jasap.
Daryndy oqýshy Atyraý qalasyndaǵy oblystyq daryndy balalarǵa arnalǵan ulttyq mamandandyrylǵan gimnaziianyń 11-synybynda oqidy. Oqý ornynyń málimetinshe, Jazira qańtar aiyndaǵy UBT-da 138 ball jinaǵan bolsa, naýryzdaǵy testileýde nátijesin 140 ballǵa jetkizgen.
Ol emtihanǵa tek mektep baǵdarlamasymen ǵana emes, qosymsha daiyndyq kýrstary arqyly da daiyndalǵan. Sonymen qatar gimnaziiadaǵy belsendi oqýshylardyń biri ári «Parasat» debat klýbynyń prezidenti.
Jazira qazaq tili men ádebietine erekshe qyzyǵýshylyq tanytady. Osy pánder kombinatsiiasyn tańdaǵan túlek bolashaqta filologiia salasyn meńgerýdi josparlap otyr.
Aita keteiik, buǵan deiin Semei qalasynyń oqýshysy Erasyl Sailaýov ta naýryz aiyndaǵy UBT-da 140 ball jinaǵany habarlanǵan edi. Sondai-aq Astanada 140 ball jinaǵan taǵy bir túlekke jeke mektep basshysy Zeekr markaly elektromobil syiǵa tartqan bolatyn.
