Atyraý oblysynda Kaspii jaǵasynan brakonerlerdiń ýaqytsha «qonysy» tabyldy, dep habarlaidy "Ult aqparat".
Bul Jaiyq-Kaspii oblysaralyq basseindik balyq sharýashylyǵy inspektsiiasy men Atyraý mamandandyrylǵan tabiǵat qorǵaý prokýratýrasy qyzmetkerleriniń birlesken reidi kezinde anyqtalǵan.
«Bekire-2021» balyq qorǵaý aktsiiasy aiasynda Kaspii teńiziniń soltústik jaǵalaýyn qamtyǵan birlesken reidke tikushaq tartyldy.
«Reid kezinde Jylyoi aýdanyndaǵy «Tereń-Ózek» ken ornyna jaqyn jerde, qamys qopasynyń arasynan ýaqytsha «qonys» tabylǵan. Onda birneshe adamǵa arnalǵan tósek-oryn jabdyǵy, gaz ballony, azyq-túlikter pen sý qory, qural-saimandar jiyntyǵy, avtomobil akkýmýliatory, fonarlar, qýattaǵysh qurylǵylar, ratsiia men bir uńǵyly myltyq bolǵan. Ýaqytsha «qonystyń» janynda jol talǵamai júrýge laiyqtalǵan 2 kólik turǵan. Sý jaǵasynda 3 rezeńke qaiyq bailanǵan. Sondai-aq, 7 qapqa qytailyq aý salynǵan» -dep habarlady Balyq sharýashylyǵy komitetiniń baspasóz qyzmeti.
Kaspii jaǵasynan tabylǵan kóliktiń biri, sondai-aq rezeńke qaiyqtar men balyq aýlaý quraldary salynǵan sómkeler Atyraý qalasyna jetkizildi. Atalǵan derekke qatysty toltyrylǵan hattamalar quqyq qorǵaý organdaryna joldanady.
Eske sala ketelik, buǵan deiin Atyraý oblysynda qamys arasyna jasyrylǵan úsh júrdek qaiyq tárkilengenin habarlaǵan bolatynbyz.
