Atyraýda kórnekti aqyn Fariza Ońǵarsynovanyń 80 jyldyǵyna arnalǵan aptalyq qorytyndylandy, dep habarlaidy "Ult aqparat".
Qurmanǵazy atyndaǵy mádeniet saraiynda ótken qorytyndy keshke QR Mádeniet jáne sport vitse-ministri Nurqisa Dáýeshov, Atyraý oblysynyń ákimi Nurlan Noǵaev jáne elimizdiń ár óńirinen kelgen ziialy qaýym ókilderi qatysty. N. Dáýeshov QR Mádeniet jáne sport ministri Aqtoty Raiymqulovanyń quttyqtaý lebizin jetkizdi.
«Qasietti Atyraý jerinde kesheli beri shoqtyǵy biik, maǵynasy tereń úlken shara ótip jatyr. Asqaqtatyp jyr, kúmbirletip kúi tókken tamasha keshti ult rýhynyń merekesi deýge bolady. Osylaisha, poeziia padishasyna arnalǵan mádeni sharalar óz máresine jetti, azdaǵan qimastyq sezimi de joq emes», - dedi ol.
Al aptalyqtyń ár sharasyn qalt jibermei, aqynnyń jyr-shýmaǵyn jatqa aitqan oblys ákimi Nurlan Noǵaev el rýhyn asqaqtatar mundai is-sharalar jalǵasyn tabatynyna senim bildirdi.
«Fariza apamyzǵa aitylar teńeý kóp. Degenmen, onyń shynshyldyǵy men joldasqa, dosqa degen adaldyǵy bir tóbe. Búgin, mine, sonyń kýási boldyq. Óitkeni, aptalyq aiasynda ótken ár sharanyń basy-qasynda eldiń arda azamattary boldy. Olar bul sharanyń mártebesin kótergeni sózsiz. Aldaǵy ýaqytta mundai sharalar jalǵasyn taýyp, Fariza apamyzdyń shyǵarmashylyǵy keńeiip, eldiń damýyna, óskeleń urpaqtyń rýhy biik bolyp qalyptasýyna sep bolatyn tárbielik sharalardyń qatary artsyn», - dedi aimaq basshysy.
Eske sala keteiik, aptalyq aiasynda «Ar men aqyn» derekti filminiń jáne «Jyr - meniń jalǵyz tarlanym» aýdio diskisiniń tusaýkeseri ótti. Sondai-aq H.Dosmuhamedov atyndaǵy Atyraý memlekettik ýniversitetinde «F.Ońǵarsynova – kórnekti aqyn, qoǵam jáne memleket qairatkeri» atty respýblikalyq konferentsiia uiymdastyryldy. Al Sh.Sáriev atyndaǵy kórkemsýret jáne qoldanbaly sándik-óner mýzeiinde «Poeziia padishasy – boiaý tilinde» atty respýblikalyq simpoziým ashyldy. Budan bólek, óner súier qaýym «Fariza juldyzdary» jas aqyn-jazýshylar klýbynyń poeziialyq keshterin, «Jyr juldyzy – Fariza» respýblikalyq aqyndar saiysyn tamashalai aldy.
