Foto: videodan alyndy
Atyraý oblysynda qaza tapqan erli-zaiyptynyń ólimi boiynsha eki adam kúdikti dep tanyldy. Bul týraly Ishki ister ministriniń orynbasary Sanjar Ádilov málimdedi. Bul týraly Ult.kz tengrinews.kz-ke silteme jasap habarlaidy.
Onyń aitýynsha, kúdiktiler Indoneziia aýmaǵynda ustalǵan jáne olardy Qazaqstanǵa ekstraditsiialaý máselesi sheshilgen.
«Olar jaqyn arada, osy aida Qazaqstanǵa jetkiziledi. Sheteldik áriptestermen kelý baǵyttaryn pysyqtadyq», – dedi Ádilov.
Qylmys Jangeldin aýylynda ótken kúzde bolǵan. Bir otbasy túgeldei joǵalyp ketken. Qańtardyń basynda olardyń úiindegi qoradan 66 jastaǵy Maqsot Qarabalin men jubaiynyń máiiti tabyldy. Al olardyń 33 jastaǵy uly men 35 jastaǵy qyzy áli kúnge deiin tabylǵan joq.
Týystarynyń aitýynsha, erli-zaiypty qaza tapqannan keiin de olardyń atynan otbasylyq chattarǵa aýdiohabarlamalar kelip turǵan. Sonyń biri 7 qarashada jiberilgen. Alaida jaqyndary bul ýaqytta olardyń ómirde bolmaǵanyna senimdi.
25 jeltoqsanda týystary politsiiaǵa otbasy músheleri bir aidan astam ýaqyt habarsyz ketkeni týraly aryz bergen. 6 qańtarda erli-zaiyptynyń denesi tabyldy. Osydan keiin 29 jastaǵy Atyraý oblysy, Mahambet aýdany turǵynyna izdeý jariialandy.
Politsiia bul iske basqa adamdardyń da qatysy bolýy múmkin ekenin tekserip jatyr. Kúdikti Sultan Sársemaliev pen onyń áieli, joǵalǵan otbasynyń kenje qyzy Aqbaianǵa halyqaralyq izdeý jariialanǵan.
