Atyraýda aýlanǵan balyqtyń 80 paiyzy eksportqa shyǵarylyp jatyr. Bul týraly Atyraý oblysynyń ákimi Mahambet Dosmuhambetov aitty, dep habarlaidy QazAqparat.
«Óńirdiń kúrdeli klimattyq jaǵdaiyna qaramastan, aýyl sharýashylyǵyn damytýǵa erekshe kóńil bólip kelemiz. Bul salada 26 mlrd teńgege jýyq ónim óndirildi. Tushy sý tapshylyǵyna qaramastan, iri qara mal basy 4, jylqy 9,5, túie 3, qoi men eshki 2 paiyzǵa artty. Aýyl sharýashylyǵy ónimderin óndirýshilerdi de qarjylai qoldaý úshin jyl saiyn qarajat bólinýde. Biyl osy maqsatqa 3,1 mlrd teńge qarastyryldy», - dedi oblys basshysy Ortalyq kommýnikatsiialar qyzmetinde brifing barysynda.
Onyń atap ótýinshe, áleýmettik mańyzy bar azyq-túlik taýarlarynyń baǵasyn turaqtandyrý boiynsha turaqty jumystar jasalýda. Óńirde 1 mlrd 100 mln teńgeniń ústinde taýarlyq-qarjylyq turaqtandyrý qory qalyptastyryldy. Sonyń aiasynda 755 mln teńge mólsherinde ainalym qory qurylyp, óńirdegi «Ideal» iri saýda jelisimen kelisim jasaldy. Nátijesinde atalǵan jeliniń 36 saýda núktesinde áleýmettik mańyzy bar azyq-túlik taýarlarynyń 14 túri naryqtan 10-15 paiyzǵa tómen baǵamen satylýda. Sonymen qatar, áleýmettik mańyzy bar azyq-túlik taýarlarynyń baǵasyn turaqty ustaý úshin kásipkerler, taýar óndirýshiler sondai-aq iri saýda oryndary arasynda 200-den astam memorandým jasalǵan.
«Balyq sharýashylyǵynda da ósim bar. Ótken jyly osy ýaqytta 6,5 myń tonna balyq aýlansa, biyl 10 myń 150 tonna aýlandy. Onyń 90 paiyzy óńdelip, ónimniń 80% eksporttaldy», - dedi oblys basshysy.
