Atyraý jáne Astrahan oblystarynyń shekarasynda qorshaýlar ornatylyp jatyr.
«Biyl 14 sáýirde Qurmanǵazy aýdanynyń Kóptoǵai aýylynda Qazaqstan men Resei shekarasynda jańa shekaralyq qorshaý salý jumystary bastaldy», dep habarlaidy Atyraý oblysynyń Óńirlik kommýnikatsiialar qyzmeti.
Qazirgi ýaqytta 2005 jylǵy 18 qańtarda Máskeýde qol qoiylǵan «Qazaqstan-Resei memlekettik shekarasy týraly kelisimi» boiynsha eki el arasynda shekara beldeýi ornatylýda. Al, demarkatsiialyq jumystary áli aiaqtalǵan joq.
Shekara aýmaǵynda jańa qorshaýlardy 2016 áskeri bólimi júrgizýde.
«Bul jumystar qazir emes, buryn bastalýy tiis edi, biraq ártúrli sebeptermen júzege asyrylmai keldi. Tek biylǵy jyldyń 14 sáýirinde shekarashylar qurylys jumystaryna kiristi. Shekara qorshaýy jumystary júrgizilmes buryn, 13 sáýirde ákimdik, shekara qyzmeti men quqyq qorǵaý organdarynyń ókilderi Kóptoǵai aýylynyń turǵyndarymen kezdesip, jumystardyń zańdylyǵy týraly túsindirý jumystaryn júrgizgen bolatyn. Sondai-aq shekara qyzmeti men quqyq qorǵaý organdary da jasalyp jatqan jumystardyń zańdylyǵyn túsindirdi», - dedi Qurmanǵazy aýdanynyń ákimi Marat Murziev.
QR UQK Shekara qyzmetiniń ókilderi túsindirgendei, 2013 jyldyń mamyr aiynda ornatylǵan №23 jáne №24 shekaralyq belgiler arasyndaǵy metall qorshaýlar RF aýmaǵyna qarai 10-70 metrge aralyqta ornalasqan.
Qazirgi ýaqytta Resei Federatsiiasynyń aýmaǵynda ornalasqan uzyndyǵy 1800 metr qorshaýlardy turǵyzý úshin injenerlik jumystar Kóptoǵai aýylynda júrgiziledi.
