Óli balyqtardy jinaý qalanyń 4 bóliginde júrgizildi, - dep habarlaidy Atyraý oblysynyń Óńirlik kommýnikatsiialar qyzmeti.
- Balyq jinaýǵa qatysýǵa niet bildirgenderdiń bárin jumys bastalar aldynda TJD inspektorlary nusqamadan ótkizdi. Jumys tańerteńge 10.00-de bastalyp, túske deiin jalǵasty. Bastapqy qortyndylar boiynsha 20 qapqa jýyq balyq jinaldy. Jaǵdaiǵa bei-jai qaramaǵan turǵyndar eriktilerdi tamaqpen, sýsyndarmen qamtamasyz etti, - deidi ýcheskeniń úilestirýshisi Mira Esniiazova. – Eýropalyq bólik boiynsha ózen jaǵalaýyn tazalaý úshin 4 jinalý orny belgilendi: ainalma kópirden AHAJ aýdanyndaǵy kópirge deiin, AHAJ kópirinen Áliev kópirine deiin, AMÝ ýniversiteti aýmaǵynan Turǵyndar qalashyǵyndaǵy kópirge deiin jáne Turǵyndar qalashyǵynan Balyqshy yqsham aýdanyna deiin.
- Bul – álemdik tájiribe. Mysaly, Meksika shyǵanaǵynda munai tógilgen kezde jaǵalaýdy óli balyqtan tazartýǵa jergilikti turǵyndar men fermerler qatysty. Búgin bizde de jurtshylyq jaǵaǵa shyǵyp, óli balyqtardan tazalaýǵa niet bildirdi. Biraq halyqaralyq tájiribeni bilgendikten jumys istegen kezde adamdardyń qaýipsizdikterin saqtaý kerektigin túsindim, - deidi uiymdastyrýshy-eriktilerdiń biri Shynar Izteleýova. – Jergilikti bilikke usynys bildirdim. Ákimdik ókilderine, vedomstvoaralyq komissiiaǵa alǵysymdy aitamyn. Birden qoldaý kórsetip, qaýipsizdikti qamtamasyz etý týraly sheshim qabyldady. Jaiyq jaǵasyndaǵy qaýipsizdik sharalaryn TJ departamenti, «Arnaýly avtobaza» ókilderi qamtamasyz etti. Júzdegen belsendi turǵyndar jaǵalaýdy óli balyqtan tazartýǵa qatysty.
- Ózimiz ómir súrip jatqan ortanyń qaýipsizdigine ózimiz jaýapkershilik almasaq, qaýipsizdikti de qamtamasyz ete almaimyz. Bul týraly oblys ákimi de aitty, tazalyqty saqtaýǵa árqaisymyz jaýaptymyz dep. Ózara bailanystyń alǵashqy jaqsy tájiribesi dep aitýyma bolady. Bárimiz birge problemany sheshýge shyqtyq. Alda da osyndai jaǵdailar bola qalsa, birlikte bolamyz degen oidamyn, - dep atap ótti Shynar Izteleýova.
Oblystyq balyq sharýashylyǵy basqarmasynyń basshysy Artýr Sádibekulynyń aitýynsha, óli balyqtardy jinaý jumysy aiaqtalǵannan keiin balyqty baqylaý maqsatymen ólsheý jumysy júrgiziledi jáne qortyndysy BAQ-ta jariialanady. Eki kúnniń ishinde 493 kg óli balyq jinalǵan.
- Jinaý jumysy Jaiyq ózeni tolyq erigenge deiin jalǵasady. Endi bul sharalarǵa «Arnaýly avtobaza» JShS qyzmetkerleri men oblystyq orman sharýashylyǵy jáne janýarlar dúniesi aýmaqtyq inspektsiiasynyń mamandary ǵana emes, jergilikti turǵyndar da qatysa alady. Bul bastamaǵa qýanyshtymyz, adamdardyń tabiǵatqa, Jaiyqqa degen janashyrlyǵyn, qoldarynan keletin kómekterin aiamaitynyn kórdik, - deidi Artýr Sádibekuly.
Vedomstvoaralyq komissiia músheleri atap ótkendei, aldaǵy kúnderi ózen muzdan tolyqtai tazarady, arnany tazartýmen balyq aýlaý kooperativteriniń tájiribeli mamandary ainalysady.
Aita keteiik, balyq jinaý jumysyna jalpy sany 150-ge jýyq atyraýlyq qatysty. Barlyq jinalǵan balyqtar sanalyp, qylmystyq is materialdaryna tirkeledi, sodan keiin «Arnaýly avtobaza» JShS poligonynda joiylady.
