«Nur Otan» partiiasynyń oblystyq filialynda oblystyq vedomstvoaralyq jumys tobynyń keńeitilgen otyrysy ótti, dep habarlaidy "Ult aqparat".
«Nur Otan» partiiasy oblystyq filialy tóraǵasynyń birinshi orynbasary Nurlybek Ojaev jáne vedomstvoaralyq komissiianyń tóraǵasy, oblys ákiminiń orynbasary Álibek Náýtiev ótken jyldyń jeltoqsan aiynda Jaiyq ózeninde balyqtyń qyrylý sebebin anyqtaýǵa jumyldyrylǵan memlekettik organdar basshylarynyń esepterin tyńdady.
N.Ojaev atap ótkendei, búginde atalǵan problema turǵyndardy alańdatýda. Aýa raiynyń jylynýyna bailanysty ózen jaǵalaýynda balyq ólekseleri jinalyp qalǵan. Kóptegen turǵyndar partiianyń qoǵamdyq qabyldaýyna kelip, múddeli organdardyń osy máseleni sheshý boiynsha atqaryp jatqan naqty sharalary jóninde halyqty aqparattandyryp otyrýdy suraǵan.
Búgingi tańda partiia halyqtyń múddesin qorǵaityn jáne Elbasy tapsyrmalarynyń oryndalýyn baqylaityn basty institýtqa ainaldy. «Halyqqa kómek» jańa partiialyq jobasy iske asa bastady. Bul joba tikelei Elbasynyń tapsyrmasy boiynsha qolǵa alynǵan. Turǵyndardyń, jurtshylyqtyń problemalaryna jedel áreket etý qajettigin Memleket basshysy partiianyń XVIII sezinde de atap ótti.
Osy jumystar aiasynda júieli sheshýdi, jan-jaqty zerdeleýdi qajet etetin qoǵam nazaryna ilingen, problemalyq, qiyn máselelerge proaktivti monitoring júrgiziledi.
"Qazir aimaq halqyn alańdatyp otyrǵan problema - Jaiyq ózeniniń jaǵdaiy, balyqtardyń qyrylýy. Partiia músheleri Jaiyq jaǵalaýyn qoqystan tazartýǵa arnalǵan jalpyqalalyq senbilikke qatysty. Bir kúnniń ishinde 52 tonna qoqys, 4,3 tonna óli balyq jinaldy",-dedi Nurlybek Ojaev.
Partiia alańynda ótken vedomstvoaralyq jumys tobynyń otyrysynda sóilegender ózen sýynyń sapasyn, balyq pen balyq ónimderiniń bazarlarda, saýda núktelerinde satylýyn baqylaý, balyq ólekselerin jinaý, jaǵalaýdy turmystyq qaldyqtardan tazartý boiynsha atqarylyp jatqan sharalar týraly aitty.
Kezdesý barysynda ózende balyq qyrylýynyń sebepterin anyqtaý jaiy «Nur Otan» partiiasynyń nazarynda ekeni jáne kún saiynǵy monitoring qortyndysy partiianyń oblystyq filialyna jiberiletini aityldy.
«Ekologiia departamentiniń, qoǵamdyq densaýlyq saqtaý departamentiniń, politsiia, densaýlyq saqtaý basqarmasy, veterinarlyq qyzmet basshylary júrgizilip jatqan jumystar boiynsha tolyq aqparat berdi. Bazarlarda, saýda oryndarynda balyq ónimderin satý núktelerine baqylaýdy kúsheitý týraly tapsyrma berdik. Qazir jaǵdai turaqty. Kún saiynǵy monitoring ózen sýynda normadan aýytqý joq ekenin kórsetip otyr. Satýǵa shyǵarylǵan jáne jańa aýlanǵan balyqtarǵa zerthanalyq synamalar buzýshylyqtardy anyqtamady. Meditsinalyq mekemelerge balyq ónimderinen ýlaný, infektsiialyq aýrý deregimen túskender tirkelgen joq», - dep atap ótti Nurlybek Ojaev.
Veterinarlyq qyzmet balyq ónimderin satatyn 41 saýda núktesin baqylaýda ustap otyr. Balyq aýlaý ornynan satý núktesine deiingi jáne tutynýshyǵa jetkenge deiingi aralyqtyń bárine monitoring júrgiziledi. Satý oryndarynyń bárine oblystyq partiialyq baqylaý komissiiasynyń músheleri tekserý júrgizetin bolady. Quqyq qorǵaý organdaryna tekserýdi ashyq júrgizip, qortyndysy týraly naqty aqparatty usyný tapsyryldy. Ákimdik balyq satylýy múmkin jerlerdiń bárine qatań baqylaý jasaidy.
Vedomstvoaralyq jumys tobynyń keńeitilgen otyrysynda Atyraý oblystyq ákimdiginiń jáne «Nur Otan» partiiasy oblystyq filialynyń bastamasymen biyl jazda Jaiyq ózenine ǵylymi zertteý jumysy júrgiziletini aityldy.
Oblystyq máslihat depýtattarynyń sheshimi boiynsha osy maqsatqa jergilikti biýdjetten 80 mln teńge bólindi. Tender jariialanyp, oǵan otandyq, sheteldik ǵylymi-zertteý toptary qatysa alady. Zertteý jazdyń úsh aiynda júrgiziledi dep josparlanýda. Sodan keiin ekologiialyq ahýal, lastaný sebepteri men sý sapasy týraly problemalyq máseleler boiynsha mamandar naqty usynymdar beredi. Ózen jaǵdaiy Mahambet aýdanynan bastap Kaspii teńizine quiylatyn jerge deiin zertteledi.
Oblystyq vedomstvoaralyq komissiianyń keńeitilgen otyrysynda aitylǵan barlyq tapsyrmalar partiianyń baqylaýyna alynady. Ár baǵyt boiynsha júrgizilgen jumystar týraly jurtshylyqqa jedel aqparat beriledi.
