Politsiia departamentiniń qyzmetkerleri Almaty 1 stansasynda Qaraǵandy oblysynyń turǵynyn ustady. Onyń qolynda jappai tártipsizdik kezinde urlanǵan taýarlarǵa toly sómke bolǵan, dep habarlaidy Sputnik Qazaqstan.
"Jedel izdestirý sharalary barysynda 11 qańtarda Almaty 1 stansasynda Qaraǵandy oblysynyń 22 jastaǵy týmasy ustaldy. Odan Almaty men Almaty oblysyndaǵy tártipsizdik kezinde urlanǵan zattar tárkilendi. Tekserý kezinde er adamnan túrli taýar, sonyń ishinde átir, kúnnen qorǵaityn kózildirik, qol saǵaty, kúrtke, kosmetika men gadjetter tabyldy. Kúdikti qamaýǵa alyndy", - dedi departament basshysy Ońal Bekiev.
Bul fakti Qylmystyq kodekstiń 188-baby "Urlyq" boiynsha tirkeldi.
Kinálini 1000 AEK-ke deiin (3 063 000 teńge) aiyppul nemese úsh jylǵa deiin bas bostandyǵynan aiyrý jazasy kútip tur.
Tótenshe jaǵdai kezinde eldiń temirjol jáne áýe kóligi nysandarynda 22 quqyqbuzýshy ákimshilik jaýapqa tartyldy. Sondai-aq Qylmystyq-protsessýaldy kodekstiń 128-baby boiynsha alty kúdikti ýaqytsha ustaý izoliatoryna qamaldy. Sotqa deiingi tergeýdiń biryńǵai reestrinde osy jyldyń qańtarynda barlyǵy 31 qylmys tirkeldi.
Kólik politsiiasynyń basshysy qańtar aiynyń basynda bolǵan oqiǵalardan keiin politseiler kúsheitilgen rejimge kóshirilgenin atap ótti.
