Fetýllah Gúlenniń izbasarlary Qyrǵyzstanda memlekettik tóńkeris jasaýy múmkin degen sóz — «sandyraq». Qyrǵyzstan prezidenti Almazbek Atambaev Ankaranyń alańdaýyna orai dál osylai dep jaýap qatty. Bul týraly Ult.kz tilshisi "Astana" arnasyna silteme jasap habarlaidy.
Óz sózinde qyrǵyz basshysy «bizge jón siltep, shart qoiýdyń qajeti joq» dep málimdedi. Aita keteiik, buǵan deiin Túrkiianyń syrtqy ister ministri Mevliýt Chavýshogly Qyrǵyzstan biligin eldegi Gúlenge qatysy bar barlyq uiymdardy jabýǵa úndegen-di.
Almazbek Atambaev, Qyrǵyzstan prezidenti:
Bul sandyraq. Aqyldy bolsańdar, óz elderińdegi búlikke qalaisha jol berip qoidyńdar? Biz, árine, aitylǵan keńesti tyńdap, barlyq aqparatty saraptaimyz. Biraq bizdi qorqytýdyń qajeti joq.
Al Túrkiiada «tazartý» jumystary jalǵasyp jatyr. Qyzmetinen qýylǵan áskerilerdiń sany búginde 1400 adamǵa jetken. Olardyń barlyǵyna dindar Fetýllah Gúlenmen qatysy bar degen aiyp taǵylyp jatyr.
Búlikten keiin memlekettik basqarý apparatynda túrli qyzmette bolǵan 66 myńnan astam adam jumystan shettetilgen. Resmi Ankara budan bylai tónkeristi boldyrmaý úshin kúshtik qurylymdardy qaita qurýǵa ázir. Al Redjep Taiyp Erdoǵan qarýly kúshter men tyńshylardy óziniń tikelei qaramaǵyna alýǵa nietti. Buryn olar premer-ministrge baǵynyp keldi.
Qazir ásker generaldarynyń jartysyna jýyǵy otstavkaǵa jiberilgen. Eske salsaq, Túrkiiada memlekettik tóńkeris áreketi 16 maýsymda boldy. El biligi onyń artynda qazir AQSh-ta turyp jatqan Fetýllah Gúlen tur dep málimdegen edi. Biraq Aq úi ákimshiligi onyń kinásin dáleldeitin aiǵaq usynbasa, 75 jasar dindardy Túrkiia biligine berýden bas tartty.
