Jańa Konstitýtsiiadaǵy negizgi ári qaǵidatty ózgeristerdiń basym bóligin Memleket basshysy tikelei ózi usyndy.
Beisenbi, 26 aqpan kúni, «Ádiletti ári Progressivti Qazaqstannyń Halyqtyq Konstitýtsiiasy úshin» jalpyulttyq koalitsiiasynyń músheleri Aqtóbe oblysynyń aktivimen kezdesti. Is-shara barysynda Memlekettik keńesshi Erlan Qarin eldiń jańa Ata Zań jobasy qalai ázirlengeni týraly mańyzdy ári qyzyqty derektermen bólisti.
Onyń aitýynsha, Prezident tek reformalarǵa bastamashy bolyp qana qoimai, jańa Konstitýtsiianyń negizgi erejeleriniń tikelei avtory boldy.
«Prezidenttiń memlekettik qundylyqtarǵa degen qasterli ári muqiiat kózqarasynyń jarqyn kórinisteriniń biri – mátindermen jumys isteý mádenieti. Memleket basshysy Qasym-Jomart Kemeluly túrli qujattarmen jumys istegende, óziniń sóileitin sózderinde «Egemendik» jáne «Táýelsizdik» uǵymdaryn árdaiym bas árippen jazady», – dep atap ótti Erlan Qarin.
Memlekettik keńesshiniń pikirinshe bul jai ǵana stilistikalyq erekshelik emes, eldiń joǵary basshylyǵy ustanatyn qaǵidatty ustanym.
«Prezidenttiń oiynsha, bizdiń de pikirimizshe, bul sózder – qasietti, qasterli uǵymdar. Ata Zańnyń jańa mátininde de osy ustanym saqtaldy», – dedi ol.
Erlan Qarinniń sózinshe, Prezidenttiń tájiribesi mol – ol memlekettik jáne halyqaralyq deńgeidegi eń joǵary laýazymdarda qyzmet atqardy. Mundai qyzmetterde árbir sózdiń dáldigi úlken mánge ie. Sol sebepti de tujyrymdarǵa airyqsha muqiiat qaraidy.
«Ol uzaq jyldar boiy Parlamentte, Úkimette, Halyqaralyq uiymdarda qyzmet atqardy. Sol sebepti, qujattarmen jumys isteýdiń niýanstaryn, erekshelikterin jaqsy biledi. Árbir sózdiń salmaǵyn jaqsy túsinedi. Muqiiat qaraidy», – dedi Erlan Qarin.
Onyń aitýynsha, Qasym-Jomart Toqaev reformalarǵa jalpy basshylyq jasaýmen shektelmei, jańa Ata Zańnyń árbir erejesin jeke ózi muqiiat ázirleýge tikelei aralasqan. Prezidenttiń tikelei bastamasymen Konstitýtsiiaǵa irgeli ózgerister engizildi.
«Memleket basshysy Parlamenttik jáne Konstitýtsiialyq reformalar aiasynda usynylǵan árbir bastamany jeke ári egjei-tegjeili zerdeledi. Sondyqtan jańa Konstitýtsiiadaǵy negizgi ári qaǵidatty ózgeristerdiń kóbin ol ózi usyndy. Mysaly, jańa Preambýla Prezidenttiń tujyrymdamalyq tezisteri negizinde ázirlendi. Sol siiaqty jańa Konstitýtsiiadaǵy úlken jańashyldyqtardyń, ásirese qarapaiym azamattardyń múddesin qorǵaityn jańa normalardyń avtory da – ózi», – dep atap ótti Memlekettik keńesshi.
Sóz sońynda Erlan Qarin Jańa Konstitýtsiiada Memleket basshysynyń anyq qoltańbasy bar ekenin jetkizdi. Onyń aitýynsha, Qasym-Jomart Kemelulyn qujattyń negizgi basty avtorlarynyń biri desek te esh qatelespeimiz.
Eske sala keteiik, Prezident Jarlyǵymen jańa Konstitýtsiia jobasy 2026 jylǵy 15 naýryzda ótetin respýblikalyq referendýmǵa shyǵaryldy. Qujatty talqylaý jarty jylǵa sozylyp, azamattardan, sarapshylardan, saiasi partiialar men uiymdardan túsken myńdaǵan usynystar eskerildi.
