Zoom platformasynda qazaqstandyq ata-analardyń tamyz konferentsiiasy ótip jatyr, dep habarlaidy QazAqparat.
Onlain konferentsiiaǵa Qazaqstannyń túkpir-túkpirinen 1 myńǵa jýyq ata-ata qatysýda. «Senim men bolashaq» respýblikalyq ata-analar qoǵamdyq birlestiginiń uiymdastyrýymen ótip jatqan shara aiasynda jańashyl pedagogter men bilim berý salasynyń tabysty menedjerleri dáris oqyp, olardyń ata-analarmen pikir almasýy josparlanǵan.
Mysaly, zertteýshi pedagog Nurlan Imanǵaliev «jańa oqý jylyna ata-ana qalai daiyndalýy kerek» degen taqyrypta dáris oqyp, ýaqyt menedjmentin tiimdi uiymdastyrý joldaryna toqtaldy.
«Balańyz tabysty azamat bolyp jetilsin deseńiz, oǵan ýaqyt menedjmentin úiretýińiz kerek. Al oǵan birdeńe úiretý úshin ony áýeli ózińiz jetik bilýińiz qajet. Sondyqtan eń áýeli ýaqyt menedjmentin saýatty uiymdastyrýǵa kóńil bólińiz. Ata-analardyń kóbi balasy 11 synypqa kelgende ókinip jatatynyn jyl saiyn kórip júrmiz. Sondai ókinish bolmaýy úshin balańyzdyń bolashaǵyn 4-5 jyl buryn josparlap daǵdylanyńyz. Sebebi bala armandai alǵanymen, tabiǵatynan 4-5 jylǵa jospar qura almaidy. Mysaly, IELTS-ten súrinbei ótý úshin keminde 120 sabaq alý kerek. Al munsha kólemdegi bilimdi 1-2 aptanyń ishinde alyp úlgerý múmkin emes. Balanyń úlgerimine, synaqtarǵa daiyndyǵyna syn saǵat taiaǵanda emes, erte bastan daiyndalý osy úshin mańyzdy», - deidi pedagog.
Onyń aitýynsha, balasynyń bolashaǵyna alańdaityn kez kelgen ata-ana qazirgi tehnologiianyń igilikterin óz ikemine qarai paidalaný kerektigin aitty.
«Bilim berý júiesi ózgerip jatyr. Baǵany emes, ár pánniń úirený maqsattaryn ata-ana bilý kerek. Ár pán boiynsha bala bir toqsanda neni úirený kerektigin toqsannyń basynda naqtylap alsańyz, onyń úlgerimin toqsan boiynda qadaǵalap otyra alasyz. Tek alǵan baǵasyn surai bergennen taqyryp boiynsha pikir almasyp qadaǵalaý áldeqaida tiimdi», - dedi Nurlan Imanǵaliev.
Onlain konferentsiia sheńberinde «Jańa urpaq» jobasynyń avtory, otbasy koýchy Ashat Ábjanov, psiholog-pedagog Aijan Ádilbaeva, «Senim men bolashaq» respýblikalyq ata-analar qoǵamdyq birlestiginiń mamandary dáris oqyp, treningter ótkizý josparlanǵan.
