29 qańtar kúni Almaty tehnologiialyq ýniversitetinde «JasStar» jobasy aiasynda «Jastar jylyna» arnalǵan Almaty qalasy Máslihatynyń depýtaty, akter, taekvondodan QR chempiony Asylhan Tólepovpen kezdesý ótti.
Biylǵy jyl Elbasy N.Á.Nazarbaevtyń qoldaýymen «Jastar jylyna» arnaldy. Soǵan orai túrli sharalar uiymdastyrylýda. Sonyń biri – Almaty tehnologiialyq ýniversitetiniń stýdentteri «JasStar» jobasy aiasynda Almaty qalasy Máslihatynyń depýtaty, akter, taekvondodan QR chempiony Asylhan Tólepovpen kezdesti.
Kezdesý barysynda akter alǵashqy tabysy, «Jaýjúrek myń bala» kinofilmindegi qyzyqty túsirilimder, depýtattyq qyzmetke bailanysty suraqtarǵa jaýap berdi. Akterdiń aitýynsha, ol mektep kezinen taekvondo sport túrinen túrli jetistikterge jetken. Alaida, ata-anasy ony 9-synyptan soń T.Q. Júrgenov atyndaǵy Qazaq ulttyq óner akademiiasynyń kolledjine oqýǵa túsirgen. Osydan keiin ǵana onyń ónerge degen yqylasy oiana bastaǵan. Bul jóninde Asylhan Tólepov: «Oqýǵa aqyly bólimge tústim. Ata-anama salmaq salmaiyn dep bazarda jemis-jidek satqan kezim de boldy. Biraq, baǵym janyp, 18 jasymda alǵash ret kastingten ótip, basty rólge bekitildim. Bul – «Jaýjúrek myń bala» filmi edi. Anam sol kezde senbei qýanyshtan jarty saǵat jylaǵan edi. Ónerge degen qadamym osylai bastaldy» dep jaýap berdi. «Jaýjúrek myń bala» filminen soń da ózi somdaǵan Sartai batyrǵa qatysty syn-pikirler bolǵanyn da aityp ótti.
Sondai-aq, «Jastar jyly» forýmynyń ashylýyndaǵy áserimen bólisip, osy jyldyń jastarǵa erekshe ózgeris bolaryna senimdi. «Biylǵy jyl elimizdiń jastar úshin úlken múmkindik bolary anyq. Jastarǵa kóp kóńil bólinedi dep oilaimyn. Forýmnyń ashylýy kezinde QBTÝ-dyń 2 kýrstaǵy 13 jasar výnderkind-stýdent balaǵa tańǵaldym. Elimizde «Jastar jyly» burynnan atalyp ótýi kerek edi. Bizde talantty jastar kóp. Tek olarǵa qoldaý bildirý kerek. Biylǵy jyldan kúterim mol», - dedi akter.
Kezdesý sońynda kesh qonaǵy Asylhan Tólepov áserli suraq qoiǵan úsh stýdentke arnaiy ákelgen kitaptaryn tartý etti.
