Nur-Sultannyń jylý magistraldaryn jańǵyrtý jumystary 1 qazanda tolyq aiaqtalmaq, dep habarlaidy QazAqparat.
«Búgin elordadaǵy jylý magistraldaryn qaita jańǵyrtýǵa arnalǵan investitsiialyq baǵdarlamaǵa sáikes qolǵa alynǵan nysandardyń birindegi jumys barysymen tanystyra ketýdi jón kórip otyrmyz. Ol – 21-shi jylý magistrali. Bul - biyl iske asyrylatyn 12 jobanyń biri. Qazirgi tańda joba aiaqtalýǵa jaqyn qaldy. 1 qazan kúni paidalanýǵa beremiz», - dedi tilshilerge nysan basynda suhbat bergen «Astana-Teplotranzit» AQ basshysynyń qurylys jónindegi orynbasary Qurmanǵazy Nuǵymanov.
Onyń aitýynsha, elordanyń shyǵys bóligindegi jylý magistrali sonaý 1979 jyly qoldanysqa berilgen.
«Jylý qubyrlarynyń bári tolyǵymen jańa. Jer asty jáne jer ústimen júredi. Jylý magistrali trassasynyń uzyndyǵy – 594 metr. Bul jerde joǵary bilikti mamandar jumys isteýde. Jumystyń bári kestege sai júrgizilip keledi», - dedi ol.
Qurmanǵazy Nuǵymanovtyń sózine sensek, 12 joba boiynsha jylý magistralin qaita jańǵyrtý jumystarynyń arqasynda eski qalada turatyn halyqtyń 70 paiyzy 30 jyl boiy jylý jaǵynan jaisyzdyqty sezinbeidi. Iaǵni, bul kásiporyn osyndai kepildik berip otyr. Jylý magistraldaryn tartýda 100 paiyz otandyq ónim paidaǵa jaraǵan.
«Jylý magistraldaryna jańa aityp ketkendei investitsiialyq baǵdarlamalar boiynsha qarajat bólingen. Ár nysan boiynsha jospar daiyndap, monopoliiaǵa qarsy kúres komitetine tapsyrǵan bolatynbyz. Mysaly, myna 21-shi jylý magistralin qaita jańǵyrtý jumysyna 300 mln teńge jumsaldy. Qala boiynsha dál osyndai 12 nysan jasalyp jatyr. 1 qazanda bárin bitiremiz. Nysandardyń kóbi Saryarqa, Almaty, Baiqońyr aýdanynda. Jalpy, 12 jobany iske asyrýǵa 1,4 mlrd teńge jumsaldy», - dedi Qurmanǵazy Nuǵymanov.
