Elordada 82 myńnan astam zeinetker, 25 myń múmkindigi shekteýli jan turyp jatyr. Bul týraly qalalyq ákimdikte ótken brifingte aityldy, dep habarlaidy "Ult aqparat".
«Elordada qart adamdardyń problemalaryna nazar aýdarylady. Olardyń materialdyq jaǵdaiyn jaqsartý, ómir súrý sapasyn arttyrý, qazirgi zamandaǵy áleýmettik jaǵdaiyn jaqsartý jóninde sharalar qabyldanady», - deidi Astana qalasynyń Jumyspen qamtý jáne áleýmettik qorǵaý basqarma basshysy orynbasarynyń mindetin atqarýshy Ilia Skýb.
1 qazan – Halyqaralyq qarttar kúnine orailastyrylǵan egde jastaǵy adamdardy áleýmettik qoldaý ailyǵy qart adamdarǵa nazar aýdarý men jan-jaqty kómek kórsetýdiń ajyramas bóligine ainaldy.
Ilia Skýbtyń aitýynsha, Nur-Sultan qalasynda Halyqaralyq egde adamdar kúnin toilaý aiasynda ardagerlerdi qurmetteý, syi-syiapat kórsetý jáne olardyń muqtajdyqtaryna tiisti kóńil bólý dástúrge ainalyp otyr. Qalanyń barlyq uiymdary men kásiporyndary ártúrli qaiyrymdylyq aktsiialaryn ótkizýde.
«Búginde jergilikti biýdjet qarajatynyń esebinen 67 myń zeinetkerge (zeinetaqynyń eń tómengi mólsherin alýshylardan basqa) 6313 teńgeden birjolǵy materialdyq kómek kórsetiledi. Barlyq qalalyq jolaýshylar kóliginde tegin jol júrý, sondai-aq tegin tis protezdeý qyzmetteri kórsetiledi. Odan bólek, kómir satyp alýǵa 40 400 teńge kóleminde áleýmettik kómek jasalady», - deidi ol.
Sondai-aq, «Shýchinsk-Býrabai» kýrorttyq aimaǵynda Qatarkól kóliniń jaǵasynda ekologiialyq taza ormandy alqapta ornalasqan «Qarttarǵa, múgedekterge jáne múgedek balalarǵa arnalǵan ońaltý ortalyǵy» ShJQ MKK-de shipajailyq-kýrorttyq emdelýge áleýmettik kómek kórsetilip, zeinetkerlerge joldama qunynyń 35%-y (53 900 teńge), al eń tómen mólsherdegi zeinetaqy alýshylarǵa joldama qunynyń 25%-y (38 500 teńge) tólenedi. Ekinshi dúniejúzilik soǵys ardagerlerine, solarǵa teńistirilgen tulǵalarǵa, múmkindigi shekteýli tulǵalarǵa joldama tegin túrde usynylady.
«Jyl basynan shipajailyq-kýrorttyq emdelý qyzmetterimen 4 myńǵa jýyq adam, onyń ishinde 1,7 myń zeinetker, 2 myńnan astam múmkindigi shekteýli tulǵa qamtyldy», - deidi Ilia Skýb.
