«Astana» áleýmettik-kásipkerlik korporatsiiasynyń 10 kásiporyny jabylady, dep habarlaidy QazAqparat.
Bul týraly elorda ákimi Altai Kólginov Prezident Joldaýyn talqylaý boiynsha qala aktiviniń kezdesýinde málimdedi.
«Astana» ÁKK jelisi boiynsha kásiporyndar sanyn 24-ten 14-ke deiin qysqartýdy josparlap otyrmyz. Bul arqyly jylyna 2 mlrd teńgege deiin únemdei alamyz. Iaǵni, qaitalama qyzmet kórsetip otyrǵan bir ǵana «Astanaenergoservis» AQ jabýdan jylyna 1 mlrd teńge únemdeledi. Únemdelgen qarajatty qystyq tehnika alýǵa jumsaimyz. Bizdegi qystyń qatty ekenin bilesizder. Avtopark bolsa eskirdi. Sondyqtan, kvazimemlekettik sektordan únemdelgen ishki rezervterimizdi osyndai paidaly isterge jumsaimyz. Qysta qala turǵyndaryna yńǵaily bolýy úshin tehnika alamyz», - dedi Altai Kólginov.
Sonymen birge, ákim qoldanylmai jatqan jerdi qaitaryp alý jumystary jóninde baiandady.
«Úsh jylda jalpy aýmaǵy 1,6 myń gektar bolatyn 70 jer telimi qaitaryp alyndy. Qazir 904 gektar bolatyn 251 jer telimi tekserilip jatyr. Onyń ishinde kommertsiialyq maqsatta 492 jer telimi (429 gektar), aýyl sharýashylyǵy maqsatynda – 50 jer telimi (500 gektar) bar. Sot sheshimimen biyl igerilmegeni úshin 882 gektar bolatyn 6 investitsiialyq jer telimi alyndy. Bul jumystar áli de jalǵasady», - dedi A. Kólginov.
