Biylǵy merekede halyqtyq serýen, kontsertter, spektaklder, kórmeler, baiqaýlar men jarystar uiymdastyrylady. Naýryz baǵdarlamasy aǵymdaǵy jyly erekshe mazmundy bolmaq, dep habarlaidy "Ult aqparat" qala ákimdiginiń resmi saityna silteme jasap.
Astana qalasy ákimdiginiń otyrysynda qala ákiminiń orynbasary Nurlan Nurkenov Naýryz meiramyna daiyndyq barysy týraly áńgimeledi. Mereke tujyrymdamasy ázirlendi, sahnalyq alańdardy, ishki oryn-jailardy, irgeles aýmaqty bezendirý eskizderi daiyndaldy.
«Mereke aiasynda túrli formattaǵy 40-tan astam is-shara ótedi dep josparlanǵan. Baǵdarlamada halyqtyq serýen, kontsertter, spektaklder, kórmeler, konkýrstar bar. Astanada sporttyq is-sharalar jarystar, jaýyngerlik sport túrleri, qazaq kúresi boiynsha chempionattar ótedi», - dedi N.Nurkenov.
Qala aýmaǵynda Naýryzdy merekeleýdiń 23 núktesi anyqtaldy, onda mereke kúnderi halyqtyq serýen formatyndaǵy is-sharalar uiymdastyrylady.
Merekelik sharalar ótetin negizgi oryndar: EKSPO aýmaǵy, Qalalyq alań, «Qazaq Eli» monýmenti, «Jastar» saraiy, sondai-aq «Jetisý» saiabaǵy. Budan basqa, on turǵyn úi alabynda («Qazqalashyq», «Óndiris», «Jeleznodorojnyi», «Michýrino», «Internatsionalnyi», «Promyshlennyi», «Prigorodnyi», «Úrker», «Kóktal-1», «Kóktal-2») fondyq alańdar uiymdastyrylady. Jeti turǵyn úi kesheni («7-Ia», «Aqbulaq taýn», «Qainar», «Apato», «Dostar», «Salamat», «Zerde»), sondai-aq, «Jastar» teatrynyń alańy da bar. Barlyq alańdarda kontserttik baǵdarlamalar uiymdastyrylyp, kiiz úiler, altybaqandar ornatylady. Mereke kúnderi is-sharalar ótkiziletin oryndarda saýda, ulttyq sport túrleri boiynsha sporttyq jarystar ótedi.
Basty etnoaýyl 21-22 naýryzda EKSPO aýdanynda Qazaqstan Respýblikasy Táýelsizdiginiń 25 jyldyǵy monýmentiniń janynda uiymdastyrylady. Is-shara aiasynda qazaqstandyq juldyzdardyń qatysýymen merekelik kontsert, sándik-qoldanbaly óner buiymdarynyń mýzeilik kórmesi uiymdastyrylady. Árbir kiiz úidiń janynda Astana qalasy teatrlarynyń ártisteri men etnomádeni birlestikter ókilderiniń oryndaýynda ulttyq salt-dástúrlerdi kórsetý josparlanǵan. Jeke aimaq fýd-kortqa bólinedi. Etnoaýyl aýmaǵynda palaý, naýryz kóje jáne baýyrsaq daiyndaý úshin qazandar ornatylady.
«Mereke kúnderi is-sharalarǵa 300 myńnan astam elorda turǵyndary men qonaqtary qatysady dep kútilýde», - dep atap ótti N.Nurkenov.
