Foto: AstanaTV arnasy
Ekstrarenaldi ekstrakranialdi rabdoidty isik álem boiynsha óte sirek kezdesedi. ERO-ǵa eki adam ǵana shaldyqqan. Bireýi Qazaqstanda anyqtaldy, dep habarlaidy Sputnik Qazaqstan portaly AstanaTV arnasyna silteme jasap.
Qaterli isiktiń bul túrimen Amerikada bir adam aýyrady. Ekinshisi – elordalyq 3 jastaǵy Mariam Bailina. 2 jyl buryn qyz balanyń oń jaq qoly qaqsap, 10 ai boiy Astanadaǵy ortalyqta 9 himioterapiia men 28 sáýlelik terapiia alyp, jaǵdaiy sál-pál jaqsarǵan. Biraq ol kezdegi diagnoz basqasha boldy. Úsh aidan soń metastaz anyqtalyp, aýrý asqyna tústi. Otbasy men týystary dereý qarajat jinap, Mariamdy Túrkiiaǵa jiberdi. Álemdegi úzdik dárigerlerdiń biri birden balany mazalaǵan aýrýdy dóp tapty.
"Durys diagnoz qoiý maqsatynda Túrkiiaǵa jiberdik. Metastaz tarap ketpeý úshin tez em qabyldaýymyz kerek dedi. Bala shetinep ketýi múmkin dedi. Búkil halqyma myń alǵys aitamyn. Aiaq astynan qanshama "sbor" jasap, shamasy kelgenshe berip jatyr, ol 1 himiiaǵa jetti. Kishkentai ǵana qyzymyz ómir súrý kerek dep oilaimyn", - deidi búldirshinniń ájesi Gúlstan Bailina.
Qazirgi kezde Mariam anasymen Túrkiiada birinshi himioterapiiany alyp boldy. Áli beseýi bar. Demek taǵy jarty jyl boiy aýrýhanada jatady. Biraq oǵan da qarajat qajet. Búginde taǵy 12 mln teńgeden astam aqsha jetpei jatyr.
"Ana men bala" ulttyq ǵylymi ortalyǵynyń onkologiia bóliminiń jetekshisi Dair Nurǵalievtiń aitýynsha, balada retsidiv boldy. Túrkiiada rabdoidti isiktiń óte qaýipti túrin anyqtady.
"Ol jaqta kórsetilip jatqan himioterapiiany biz de jasai alamyz. Qajetti barlyq dári jetkilikti. Ata-anasy Túrkiiaǵa barýdy jón kórdi. Áitpese, ózimizdiń de emdeitin múmkindigimiz bar. Qalasa esh másele týyndamaidy dep oilaimyn", - deidi dáriger.
