Astanada tanysý saity arqyly er adamdy jaldamaly páterge shaqyryp, odan 500 myń teńge bopsalaǵan úsh adam sottaldy, dep habarlaidy ult.kz.
Is materialdaryna sáikes, Qostanai oblysynyń turǵyny Nurgúl Qujaeva tanysý saitynan er adammen tanysyp, keiin ony jaldamaly páterge shaqyrǵan. Er adam kelgennen keiin páterge onyń eki sybailasy – Aqtóbeniń 33 jastaǵy turǵyny Ádilhan Amerhan men Qaraǵandynyń 24 jastaǵy turǵyny Iliias Erkin kirip kelgen.
Olar ózderin áieldiń aǵalary retinde tanystyryp, er adamdy aýyr qylmys jasamaq boldy dep aiyptaǵan. Keiin politsiiaǵa habarlamaý úshin 500 myń teńge talap etken.
Jábirlenýshi bank qosymshasy arqyly 500 myń teńge nesie rásimdep, aqshany bankomattan sheship bergen. Úsh kúdikti qarajatty ózara bólisken.
Keiin olardyń áreketi áshkerelenip, bopsalaý faktisi boiynsha qylmystyq is qozǵaldy. Úsh azamat ta kinásin moiyndap, keltirilgen shyǵyndy ótegen.
Sot Qujaeva, Amerhan jáne Erkinniń árqaisysyna 3 jylǵa bas bostandyǵyn shekteý jazasyn taǵaiyndady.
Úkim ázirge zańdy kúshine engen joq.
