Foto: QR UOK
14 aqpanda Astana qalasynda Esil ózeniniń jaǵalaýynda Italiiada ótip jatqan 2026 jylǵy qysqy Olimpiada oiyndary aiasyndaǵy jarystardy ujym bolyp tamashalaýǵa bolady. Atalǵan is-sharany Qazaqstan Ulttyq Olimpiadalyq komiteti men Astana qalasynyń Dene shynyqtyrý jáne sport basqarmasy uiymdastyrady.
Bul is-shara «Burqasyn-2026» qysqy qalalyq festivali aiasynda ótedi.
Áielder arasyndaǵy paralleldi mogýl saiysy kórermen nazaryna usynylady. Atalǵan jarysqa Qazaqstan sportshylary da qatysady. Olimpiadany tamashalaý festivaldiń mazmundy baǵdarlamasynyń bir bóligi bolyp, elorda turǵyndary men qonaqtary úshin sporttyq básekelerdi, mádeni is-sharalar men interaktivti alańdardy biriktirmek.
«Burqasyn-2026» festivaliniń saltanatty ashylýy saǵat 10:00-de ótedi. Kún boiy 13 sport túri boiynsha jarystar uiymdastyrylady. Atap aitqanda, 16 jas jáne áleýmettik sanattaǵy shańǵy jarystary, gir sporty, armrestling, pima kigen kúidegi hokkei, belbeý kúresi, motokross, avtosport, arqan tartý, qysqy mini-fýtbol, qarmen laqtyrý, qysqy voleibol, mas-restling jáne úrlemeli shanamen jarystar ótedi.
Negizgi sporttyq baǵdarlamadan keiin bas sahnada arnaiy olimpiadalyq blok bastalady. Saǵat 14:00-de 2026 jylǵy qysqy Olimpiada oiyndary aiasynda áielder arasyndaǵy paralleldi mogýl saiysyn tikelei efirde tamashalaýǵa bolady.
Transliatsiia aldynda kórermen úshin sergitý jattyǵýlary men júrgizýshimen interaktiv uiymdastyrylady. Sondai-aq olimpiadalyq taqyryptaǵy suraqtarǵa jaýap berýge arnalǵan «Olimpiadalyq blits» baiqaýy ótip, jeńimpazdarǵa syilyq tabystalady.
Jarys kezeńderi arasyndaǵy úzilisterde Qazaqstan Ulttyq Olimpiadalyq komitetiniń seriktesi Invictus GO brendinen jáne QR UOK-tiń estelik syilyqtary oinatylady.
Olimpiadalyq jarystardyń tikelei kórsetilimi saǵat 14:00-de bastalady.
Aita keteiik, 13 aqpan kúni Italiianyń Milan jáne Kortina-d’Ampetstso qalalarynda XXV qysqy Olimpiada oiyndarynyń altynshy jarys kúni bastaldy.
