«Astana Opera» sahnasynda Qazaq KSR Halyq ártisi, Qazaq KSR Memlekettik syilyǵynyń laýreaty, kúishi, sheber dombyrashy, kompozitor, dirijer ári ustaz Qarshyǵa Ahmediarovti eske alýǵa arnalǵan «Kúmbirle, asyl dombyra» kontserti ótti, dep habarlaidy "Ult aqparat".
Teatrdyń baspasóz qyzmetinen málim etkendei, sheber dombyrashynyń 75 jyldyq mereitoiyna uzaq ýaqyt ázirlik jumystary júrgizildi. Sondyqtan kontsert baǵdarlamasy mándi, mazmundy bolyp, birde-bir kórermendi bei-jai qaldyrmady. Zalǵa keremet maestronyń kóptegen áriptesteri, shákirtteri, onyń shyǵarmashylyǵyn qadir tutatyn jandar, týystary men jaqyndary jinaldy.
Kontsert Qarshyǵa Ahmediarovtyń ómiri men shyǵarmashylyǵyna arnalǵan beinefilmmen bastaldy.
Osy keshte Ǵalym Ahmediarov, Aitqali Jaiymov, Dina Hamzina, Azamat Jyltyrkózov, Rýslan Baimýrzin, Aitjan Toqtaǵan, Jumabek Qadyrqulov, Batyrlan Ábenov, Edil Basyǵaraev, Dosym Maqsutov, Daryn Qudaibergenov jáne taǵy basqa ónerpazdar kompozitordyń mol murasyn tyńdarman nazaryna usyndy.
Tanymal qazaqstandyq mýzykanttarmen qatar kontsertke Memlekettik akademiialyq filarmoniiasy qazaq orkestriniń qyryqqa jýyq ártisi qatysty. Qazaq halyq kompozitorlarynyń kóptegen shyǵarmalaryn óńdeý jáne óz paiymynsha túrlendirýden bólek, Q.Ahmediarov óziniń tól týyndylary – «Shashaqty naiza shalqar kún», «Naryn», «Qýanysh», «Saǵynysh», «Aqqaiyń», «Jeldirme» jáne taǵy basqa kúilerin, sondai-aq ánderin muraǵa qaldyrdy.
