Foto: ashyq derekkóz
Astananyń aýdanaralyq qylmystyq ister jónindegi sotynda 65 jastaǵy Gúlnar Sadyqova men 41 jastaǵy Aijan Atjanovaǵa qatysty úkim jariialandy. Sadyqova on jyldan astam ýaqyt elordadaǵy №81 mektepti basqarǵan, al Atjanova bas esepshi qyzmetin atqarǵan, dep habarlaidy Ult.kz.
Sottyń anyqtaýynsha, birneshe jyl boiy bilim berý mekemesinde alty qyzmetker jalǵan túrde tirkelip, is júzinde jumys atqarmaǵan. Olarǵa eseptelgen jalaqy zańsyz iemdenilip otyrǵan. Bul epizod boiynsha keltirilgen shyǵyn 28 mln teńgeden asqan.
Sonymen qatar mektepte mektepke deiingi bilim berýge litsenziia bolmaǵanyna qaramastan nóldik synyptar uiymdastyrylǵany belgili boldy. Tólemder qolma-qol qabyldanǵan. Osy baǵyttaǵy zalal kólemi 300 mln teńgeden asqan.
Tergeý jazǵy lagerlerdi uiymdastyrý barysynda da zańbuzýshylyqtar bolǵanyn anyqtaǵan. Qazaqstan Respýblikasy Qarjylyq monitoring agenttigi málimetinshe, bul epizod boiynsha tabys keminde 24 mln teńgeni quraǵan.
Budan bólek, sheteldik oqytýshylardy joǵary mólsherlememen jumysqa shaqyrý kezinde de qarjynyń bir bóligi iemdenilgeni dáleldendi. Áńgime shamamen 70–75 mln teńge týraly bolyp otyr. Is materialdaryna sáikes, Aijan Atjanovanyń esepshottary arqyly shamamen 175 mln teńge ótken.
Sýdia Ásel Mýkýsheva eki aiyptalýshynyń kinási tolyq dáleldendi degen qorytyndyǵa keldi. Gúlnar Sadyqova 8 jylǵa bas bostandyǵynan aiyrylyp, múlki tárkilendi. Aijan Atjanova 7 jylǵa sottalyp, avtokóligi men kommertsiialyq nysany tárkilendi.
Úkim zańdy kúshine engen joq.
