Foto: qazaqculture.com
29 jáne 30 qarasha kúnderi «Astana Opera» Úlken zalynda Qazaqstannyń kórnekti kompozitory Sydyq Muhamedjanovtyń 100 jyldyǵyna orai «Aisulý» komediialyq operasynyń kópten kútken premerasy bolady.
Qoiylym qazaq opera óneriniń úzdik dástúrlerimen usynylady. Qoiýshy dirijer, Qazaqstannyń halyq ártisi Abzal Muhitdin mýzykalyq materialdy qaita óńdep, jańa redaktsiiasyn daiyndaýda.
«Daiyndyq barysynda biz burynǵy qoiylymdardyń partitýralaryn zerttep, mýzykalyq materialdy qaita qarap, 60-70-shi jyldardyń tarihi konteksti men stilin dál beineleitin opera jasadyq. Bul jeńil komediialyq opera, biraq biz ony kúrdelirek janrǵa ainaldyrýǵa tyrysyp jatyrmyz. Eń qiyny – jeńildikti saqtap, jasalǵan jumystyń aýqymyn kórermenge baiqatpaý. Qoiylymda negizinen jas ártister qatysady, olardyń keńestik kezeńdi túsinip, sol ýaqyttyń atmosferasyna enýi qajet. Biz úshin mańyzdysy — sol dáýirdiń názik tustaryn túsindirý», – dedi Abzal Muhitdin.
Foto: qazaqculture.com
Qoiýshy rejisser Erenbaq Toikenov shyǵarmanyń komediialyq sipatyn dinamikalyq rejisserlik sheshimder arqyly jetkizbek.
«Oqiǵa Almaty vokzalyna kelgen aýyl jigiti Serkeniń ýniversitetke túsýge ekinshi ret múmkindik izdep júrgeninen bastalady. Sahnada Serke túsetin naǵyz poiyz paida bolady, bul úlken qala atmosferasyna enýge kómektesedi. Vokzalda jolaýshylar jas komsomolka Aisulýdyń sýreti jariialanǵan gazetti oqýda. Serke gazet satýshymen kezdesý arqyly dissertatsiia qorǵaýyn atap ótip jatqan Hasannyń bankettik keshine tap bolady. Osy jerde ol Aisulýdy aýylynan kelgen sulý qyz retinde qyzyǵa áńgimelep beredi. Muny estigen Hasan men Áýbákir ony aýylyna izdep barýǵa bel býady. Ekinshi akt aýylda jalǵasyp, aýyl qyzdary Nursulý men Jansulý jáne kolhoz tóraǵasy uiymdastyrǵan ázilderine ushyraidy. Sońynda olar Aisulýmen kezdesti, barlyq túsinbeýshilikter sheshilip, úsh juptyń da qýanyshty úilený toiymen aiaqtalady», – deidi rejisser Erenbaq Toikenov.
Qazaqstannyń eńbek sińirgen qairatkerleri Sofia Tasmaǵambetova men Pavel Dragýnov operanyń negizgi taqyryby bolyp tabylatyn qazaq jastarynyń ómirin beineleitin erekshe sahnalyq keńistik qurýda. Bul kórinister jaryq qoiýshy sýretshi Sergei Shevchenkonyń jáne Pavel Sývorovtyń beineproektsiialarymen tolyqtyrylady. Basty rólderde opera trýppasynyń ártisteri óner kórsetedi, al hor ártisteri Qazaqstannyń eńbek sińirgen qairatkeri Erjan Daýtovtyń jetekshiligimen horlyq kórinisterdi oryndap shyǵady. Massovka kórinisteriniń horeografy Bostan Qojabekov ártistermen birge operanyń jasyq energiiaǵa toly serpindiligin kúsheitýge tyrysýda.
