«Astana» telearnasynyń bas direktory bolyp belgili telejýrnalist Bibigúl Jeksenbai taǵaiyndaldy. Bul týraly «Nur Otan» partiiasy Tóraǵasynyń birinshi orynbasary Máýlen Áshimbaev feisbýktegi paraqshasynda jazdy.
«Belgili telejýrnalist, bilikti maman Bibigúl Jeksenbai «Astana» telearnasynyń bas direktory bolyp taǵaiyndaldy. Búgin telearnaǵa arnaiy baryp, ujymǵa jańa basshyny tanystyrdym.
Bibigúl Jeksenbai otandyq aqparat aidynynda aty qalyptasqan kásibi jýrnalist. Ál-Farabi atyndaǵy Qazaq Ulttyq ýniversitetiniń jýrnalistika fakýltetin bitirgen. Sondai-aq biznes-basqarý magistri. Eńbek jolyn qatardaǵy korrespondentten bastap elimizdegi iri buqaralyq aqparat quraldarynyń top-menedjerine deiin kóterildi. Atap aitqanda, «Habar» agenttiginde, «Qazaqstan» ulttyq telearnasynda jáne «Jetinshi arnada» jaýapty qyzmetter atqaryp, ózine júktelgen mindetterdi múltiksiz oryndai bildi.
Bibigúl Nurǵaliqyzy kóptegen telejobalar men derekti filmderdiń avtory jáne «Bas redaktorlar klýbynyń» prezidenti retinde de óziniń joǵary uiymdastyrýshylyq qabiletin kórsetti. Qandai qyzmette bolsa da tek talantty jýrnalist, myqty media-menedjer, kásibi maman jáne bilikti basshy retinde ǵana tanyldy.
Sondyqtan Bibigúl Jeksenbai jańa qyzmette de belsendilik tanytyp, «Astana» telearnasynyń odan ári damýyna tyń serpin beredi dep senemiz. Sol jolda Bibigúl Nurǵaliqyzyna jáne barsha telearna ujymyna shyǵarmashylyq tabys pen sarqylmas shabyt tileimin!», - dep jazdy M.Áshimbaev.
