4 shilde kúni «Astana Opera» memlekettik opera jáne balet teatryna Astana Opera halyqaralyq opera akademiiasy ashylady, dep habarlaidy QazAqparat.
Ashylý saltanatynda italiialyq opera ánshileri Mattia Rossi, Franchesko Melli, mońǵol opera ánshisi Badral Chýlýýnbaatar, qyrǵyz opera ánshisi Saian Isin, «Astana Opera» teatrynyń jetekshi solisteri óner kórsetedi.
«Bul árine eldegi epidemiologiialyq jaǵdailarǵa sáikes uiymdastyrylady. Osy baǵyttaǵy jumystardy aldaǵy kúnderi tamashalai alasyzdar. Astana Opera halyqaralyq opera akademiiasynyń ashylýy – Astana opera trýppasynyń solisterine sondai aq jas ánshilerge, dirijerlerge, pianisterge biliktiligin, kásibi sheberlikterin arttyrý maqsatynda júzege asyp otyr», - QR Mádeniet jáne sport vitse-ministri Nurǵisa Dáýeshov Ortalyq kommýnikatsiialar qyzmetinde ótken baspasóz máslihatynda.
«Astana Opera» Memlekettik opera jáne balet teatrynyń direktory Ǵalym Ahmediarov álemniń kóptegen tanymal teatrlarynda opera akademiialary bar ekenin eske saldy.
«Búginde Qazaqstanda kásibi vokal mektepteri bar, ol jerde operalyq án aitý ónerin úiretedi. Bizdiń akademiiamyzdyń ereksheligi – konkýrstyq tyńdaý nátijeleri boiynsha akademiiaǵa túsken jas ártister vokaldan sabaq alýdan bólek, eki jyl boiy túrli pánderdi oqidy, demek bir mezette túrli salada kásibi ósý múmkindigine ie bolady. Budan bólek, álemniń tanymal ánshiler men mol tájiribesi bar tálimger ustazdardy sheberlik sabaǵyn ótkizýge shaqyramyz. Ózderińiz biletindei, operanyń otany – Italiia, sondyqtan klassikalyq repertýardyń aitarlyqtai mańyzdy bóligi italian tilde jazylǵan týyndylardan turady. Sol sebepti bilim berý baǵdarlamasyna shet tilin úirený de engizildi. Ártister úshin mindetti baǵyttar – sahnalyq qimyl-qozǵalys pen akterlik sheberlik bolady», - dep túsindirdi teatr direktory.
Sonymen birge, jas ártister teatr spektaklderine qatysyp, rólderdi oryndai alady, sondai-aq olar «Astana Opera» kameralyq zaly sahnasynda túrli kontserttik baǵdarlamalar ázirlei alady.
