Elordada EXPO aýmaǵynda ornalasqan jańa Astana IT ýniversitetiniń tanystyrylymy ótti. Tusaýkeser rásimine QR Eńbek jáne halyqty áleýmettik qorǵaý ministri Berdibek Saparbaev, Nur-Sultan qalasy ákimi Altai Kólginov, «Nursultan Nazarbaevtyń Bilim Qory» QQ direktory Dinara Qulybaeva jáne t.b qonaqtar qatysty.
Bilim ordasynyń negizgi maqsaty – «Tsifrlyq Qazaqstan» memlekettik baǵdarlamasyn júzege asyrý aiasynda bilikti mamandar daiarlaý. Oqý ornynda kriptografiia, robototehnika, Big Data, jasandy intellekt, tsifrly kriminalistika jáne baǵdarlamalaý, t.b. pánder oqytylady. Biylǵy oqý jylynda ýniversitetke jalpy sany 579 grant bólinip, 6 baǵyt boiynsha 613 stýdent oqýǵa túsken.
«Álemdik standarttarǵa sai, zamanaýi turǵyda jabdyqtalǵan jańa IT ýniversitettiń alǵashqy stýdenti ataný búgingi jastarǵa buiyryp otyr. Ómirdegi barlyq nárse adamnyń ózine bailanysty. Ár adam zaman talabyna sai ósip-jetilip, óz eliniń órkendeýine úles qosýy kerek», - dedi B.Saparbaev
Jalpy ýniversitet qurylysyna 10 aiǵa jýyq ýaqyt jumsalǵan. Bul jerde bilim alýshylar 4 jyldyq oqý baǵdarlamasyn 3 jyl ishinde igerip shyǵady. Bilim ordasynda barlyǵy 680 oqý kabineti, onyń ishinde 140 aýditoriia bar. Sonymen birge sport zaldar men trenajerler, kovorking aimaq, arnaiy taqyryptyq kabinetter men kitaphana jumys isteidi.
«IT salasynda bilim alýǵa nietti jastar elimizdiń ár aimaǵynan jinaldy. Búgingidei tsifrlandyrý men jahandyq damý kezeńinde bilim jolyndaǵy básekege qabilettilik biz úshin óte mańyzdy. Qazirgi tańda Nur-Sultan qalasynda osy baǵyttaǵy damýdy qolǵa alý úshin kibersport boiynsha chempionat ótkizý josparda bar. Sizderdiń ýniversitetterińiz EXPO aýmaǵynda ornalasqandyqtan, «Astana Innovations», «Astana» ÁKK, «iKomek» keńseleri otyratyn saiabaq ashýdy josparlap otyrmyz. Sáikesinshe, bul sizderge tájiribe alýǵa jáne jumysqa ornalasýǵa jaǵdai jasaidy. Oqý orny ornalasqan aýmaq óte yńǵaily. Janynda saýda oiyn-saýyq ortalyǵy, saiabaq bar. Sizderge eń bastysy – oqý kerek», - deidi qala ákimi A.Kólginov.
Aita keteiik, Astana IT University quryltaishysy - «Nursultan Nazarbaevtyń Bilim Qory» qoǵamdyq qory. Aldaǵy oqý jylynan bastap ýniversitette bilim alýshylar sany 2 myńnan asyp, onyń 1700 orynyna grant taǵaiyndaý josparlanǵan.
