«Astana kóshelerin sý alyp ketý jaǵdailaryna jol berilgeni úshin halyqtan keshirim suraimyz». OKQ-da ótken baspasóz máslihatynda Astana qalasy ákiminiń orynbasary Qosman Aitmuhambetov osylai dedi.
«Qazgidromet» RMK málimetine sáikes, 20 tamyz ben 21 tamyz aralyǵynda Astananyń oń jaǵalaýynda 36 millimetr, al sol jaǵalaýynda 45 milimetrlik jaýyn-shashyn jaýǵan. Bul ailyq normadan 40 paiyzǵa artyq. Onyń ústine nóserli káriz júiesi úzdiksiz jumys atqaryp, bir táýlik ishinde bir million kýb (nemese saǵatyna 45 myń kýb) sý qabyldandy. Qalanyń negizgi magistraldy kóshelerinde sý basý jaǵdaiy tirkelgen joq. Aita keterligi, 20 tamyz kúni saǵat tańerteńgi 8-den bastap, sondai-aq 21 tamyzda saǵat tańǵy 5-ten bastap tolassyz jaǵan jaýyn toqtamady. 20 tamyzda jaýyn tek keshki 18:00-de ǵana saiabyrlady», - deidi ol.
Qosman Aitmuhambetovtiń aitýynsha, osynyń saldarynan jaýynnyń sýyn qabyldaýshy tehnikalar úlgermei, Nájimedenov, Táýelsizdik, Momyshuly kóshelerin sý alyp ketken. Tek tańǵy beske jýyq atalmysh kóshelerden sýdy soryp, tazartý múmkin bolǵan.
«Mamandandyrylǵan kásiporyndar men kommýnaldyq kásiporyndar osy ýaqyt aralyǵynda táýlik boiy damylsyz jumys istedi. OKQ alańyn paidalanyp, qala halqyna alǵys aita otyryp, keshirim suraǵymyz keledi. Sý alyp ketý jaǵdailaryna jol berildi. Eki saǵattyń ishinde másele retke kelgenimen, báribir jaǵdaidyń oryn alǵanyn jasyra almaimyz», - dedi Qosman Aitmuhambetov.
