14-22 naýryz aralyǵynda Ulystyń Uly kúni - Naýryz meiramyna orai Astana qalasyndaǵy memlekettik mekemeler, kásiporyndar men uiymdar, buqaralyq aqparat quraldary men áleýmettik jeli paidalanýshylary arasynda baiqaý jariialandy, dep habarlaidy "Ult aqparat". «Astana Naýryzy 2019» qalalyq baiqaýyn elorda ákimdigi uiymdastyryp otyr.
«Oǵan aýdandyq ákimdikter, basqarmalar, aktsionerlik qoǵamdar, memlekettik kommýnaldyq qazynalyq kásiporyndar, jaýapkershiligi shekteýli seriktestikter, qoǵamdyq birlestikter, saýda, oiyn-saýyq ortalyqtary, biznes ortalyqtary, BAQ jáne áleýmettik jelilerdiń paidalanýshylary qatysa alady», - delingen ákimdiktiń resmi saityndaǵy aqparatta.
Qatysýshylar kiiz úidi ulttyq naqyshta bezendirý, Naýryz meiramyn qarsy alý rásimderin kórsetý (Naýryz jyryn aitý, sálemdesý, kórisý, keshirim jasaý, qaiyrymdylyq kórsetý), meiramǵa arnalǵan baǵdarlama uiymdastyrý, ulttyq taǵamdardy usyný siiaqty saiystarda baq talastyratyn bolady.
«Olardyń kiimderi qazirgi zaman talabyna sai ulttyq naqyshta, jarasymdy, etikalyq, estetikalyq talǵamda bolýy kerek», - deidi uiymdastyrýshylar.
Al BAQ ókilderi men áleýmettik jelilerdiń paidalanýshylary óz materialdary (úzdik siýjetter, baǵdarlamalar, rolikter, maqalalar) #AstanaNaýryzy2019 heshtegi boiynsha jariialanǵan posttar) arqyly Naýryz meiramyn nasihattaýy tiis.
14-22 naýryz aralyǵynda konkýrs carapshylary mekemelerdi aralap, joǵaryda kórsetilgen sharttarǵa sáikes olarǵa baǵa beretin bolady. Baiqaý qorytyndysy 29 naýryzda saltanatty is-shara barysynda anyqtalady. Jeńimpazdar men júldegerler diplomdarmen, baǵaly syilyqtarmen marapattalady.
