Qazaqstan Qarýly Kúshteriniń injenerlik-saperler bólimsheleri Arystaǵy qoima aýmaǵynda tazartý, sondai-aq jarý jumystaryn jalǵastyrýda, dep habarlaidy QR Qorǵanys ministrliginiń baspasóz qyzmeti.
Baspasóz málimetterine qaraǵanda, apta saiynǵy jumys sapary barysynda Qazaqstan Respýblikasynyń Qorǵanys ministri Nurlan Ermekbaev áskeri qalashyq pen qoima aýmaǵyn qarap, atqarylǵan jumystyń nátijeleri jaiynda baiandamalar tyńdap jáne injenerlik-saperler bólimsheleriniń jeke quramymen kezdesip júrdi.
Sapardyń qorytyndysy boiynsha naqty tapsyrmalar berdi. Qazirgi tańda Arys qalasynda TJ saldaryn joiý, qoimany basqa jerge aýystyrý, metall synyqtaryn jinaý jáne suryptaý, sondai-aq Arys garnizondaryndaǵy ákimshilik aýmaqty qalpyna keltirý jáne jóndeý jumystary júrgizildi.
Kúndelikti Qarýly Kúshterde mobildi jáne injenerlik-saperler toby, tieý-túsirý komandalary, jóndeý-qalpyna keltirý toby, meditsinalyq personal, veterinarlyq mamandardan quralǵan 1500-den astam áskeri qyzmetshiler jumyldyryldy. Budan basqa, quqyq qorǵaýdy qamtamasyz etý úshin áskeri politsiianyń qosymsha jasaǵy, qalanyń 16 sektorynda halyqtyń ótinishterimen jumys atqaratyn jáne tergeý toptary quryldy.
Búgingi kúni áskeri bólimnen tys jerde aýdany 1250 sharshy km. astam aimaq tazartylyp, áskeri súńgýirler 30 shaqyrymnan astam ózen arnasyn tekserip, tazartty. 7 shaqyrym jol jóndelip áskeri qalashyqtaǵy 11 turǵyn úi qalpyna keltirildi. Sondai-aq bólimniń tehnikalyq aýmaǵynyń syrtqy qorshaýlary aýystyryldy, qalanyń ákimshilik – sharýashylyq jáne tehnikalyq aýmaqtarynda elektr qýat kózi jáne sýmen qamtamasyz etý qalpyna keltirildi.
Aita ketý kerek, barlyq jumystar belgilengen tártip boiynsha qatań qaýipsizdik sharalaryn saqtap júrgizilýde.
