Jarylystan eń kóp zardap shekken Jibek joly aýylyndaǵy №5 mektep apatty jaǵdaida jáne ony qalpyna keltirý múmkin emes, dep habarlady Jambyl oblysy ákimdiginiń baspasóz qyzmeti.
"Ol mekteptiń ǵimaraty 1958 jyly salynǵan. Munda 115 bala oqidy. Áskeri bólimdegi jarylystan keiin kei jerlerdiń tóbesi opyrylyp, qabyrǵalary, tereze oiyqtary búlingen. Ǵimarat apatty jaǵdaida jáne kúrdeli jóndeýge jatpaidy. Qazir 150 oryndyq jańa ǵimarattyń qurylysyna jobalyq-smetalyq qujat daiyndalýda. Jer telimi bólindi", - delingen habarlamada.
Ákimdik aqparatyna súiensek, №5 mektep oqýshylary qazir Jibek joly aýylynan 4 shaqyrym jerde ornalasqan Jańaturmys aýylyndaǵy mektepke barady. Balalardy mektepke jáne mektepten úige jetkizý úshin mektep avtobýstary bólingen.
"Jarylystan keiin zardap shekken Baizaq aýdanynyń aýyldarynda qalpyna keltirý jumystary qarqyndy júrgizilýde. Baizaq, Bazarbai, Jańaturmys, Kókbastaý aýyldarynda ornalasqan mektepter tolyǵymen qalpyna keltirilip, birinshi qyrkúiekte oqýshylardy qabyldaýǵa daiyn boldy. Qalǵan mektepter búlinbegen jáne shtattyq rejimde jumys isteýdi jalǵastyrýda", - deidi ákimdiktegiler.
