Qorǵanys ministrligi Jambyl oblysyndaǵy áskeri bólimde bolǵan jarylysta qaza tapqan áskeri qyzmetshilerdiń aty-jónin jariia etti, dep habarlaidy "Ult aqparat" vedomstvonyń saityna silteme jasap.
Jambyl oblysyndaǵy injenerlik oq-dáriler qoimasynda órt saldarynan kelisimshart boiynsha eki áskeri qyzmetshi – 1981 jyly týǵan serjant Marat Sailaýuly Meshinbai jáne 1981 jyly týǵan efreitor Rýslan Júrsinbaiuly Janbolatov, 1969 jyly týǵan áskerilendirilgen kúzet qyzmetshisi azamat Orazbek Daiyrbekuly Dalibaev, ońtústik aimaq áskeri prokýrory ádilet polkovnigi A.Q. Qapezov qaza tapty.
«Serjant Marat Meshinbai men efreitor Rýslan Janbolatov órttiń alǵashqy minýttarynan bastap áskeri bólimniń órt sóndirý komandasynyń quramynda boldy. Jarylystardyń janynda bolyp, olar aýyr jaraqattar aldy.
Áskerilendirilgen kúzet qyzmetshisi Orazbek Dalibaev qoimany kúzetý jónindegi qaraýyl bastyǵynyń kómekshisi qyzmetin atqardy. Qyzmettik mindetterin atqarýda oq-dárilerdiń jarylýy saldarynan qaza tapty» delingen habarlamada.
Qorǵanys ministrligi qaza bolǵandardyń týystary men jaqyndaryna qaiǵyryp kóńil aitady.
«Qorǵanys vedomstvosy tarapynan qaza tapqandardyń otbasylaryna kómek kórsetý boiynsha barlyq sharalar qabyldanady», delingen habarlamada.
Aita keteiik, keshe saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, jarylys boldy. Órt sóndirý barysynda 4 áskeri qyzmetshi qaza tapqan edi.
