Áskerge shaqyrylatyndarǵa PTR zertteýi eki ret júrgiziledi. Bul týraly QR Qarly kúshter BSh Uiymdastyrý jumyldyrý jumystar departamentiniń bastyǵy Sáken Júsipov málim etti, dep habarlaidy QazAqparat.
«Osymen ekinshi jyl áskerge shaqyrý naýqany pandemiia jaǵdaiynda ótkizilip jatyr. Áskerge shaqyrý jáne jiyn pýnktterinde koronavirýs infektsiiasynyń aldyn alýdyń ári onyń taralýyna jol bermeýdiń tájiribesi pysyqtalǵan. Ótken áskerge shaqyrý kampaniiasyndaǵy siiaqty áskerge shaqyrylatyndarǵa PTR zertteýi eki ret júrgiziledi, iaǵni, áskerge shaqyrý kezinde jiyn pýnktterinde jáne olar áskeri bólimderge kelgen kezde», - dedi S. Júsipov Ortalyq kommýnikatsiialar qyzmetinde.
Onyń aitýynsha, belgilengen sanitariialyq-epidemiologiialyq shekteýlerdi saqtaý, meditsinalyq maskamen, dezinfektsiialaý quralymen qamtamasyz etý udaiy Qorǵanys ministriniń baqylaýynda.
«Sonymen qatar, áskerge shaqyrylatyndardyń jáne olardyń ata-anasynyń karantin shekteýin saqtaý qajettigin túsinýi áskeri ortada koronavirýstyń jappai taralýyna jol bermeýge yqpal etetinin atap ótýdi qajet dep sanaimyn. Aldaǵy áskerge shaqyrý barysynda Tsifrlyq damý jáne aeroǵarysh ónerkásibi ministrliginiń 1414 qyzmetiniń servisi arqyly áskerge shaqyrylatyndarǵa SMS habarlama taratýdy jalǵastyrý josparlanyp otyr. Habardar etý protsesinde jeke qarym-qatynas jasaýdy boldyrmaý infektsiia juqtyrý qaýpin azaitady», - dedi departement basshysy.
Budan buryn habarlanǵandai, Qazaqstan Prezidentiniń 2021 jylǵy aqpandaǵy Jarlyǵyna sáikes, biylǵy 1 qyrkúiekten bastap kúzgi azamattardy merzimdi áskeri qyzmetke shaqyrý is-sharalary bastalady. Jyl sońyna deiin ásker qataryn 17 myńǵa jýyq jas jigit tolyqtyrady.
