© Photo : Pixabay
Áskeri boryshyn ótep kelgen qazaqstandyq jastar joǵary oqý oryndaryna aqyly negizde oqýǵa túse alady. Bul rette olardyń UBT-daǵy baly eskerilmeidi. Al áskerde joǵary nátije kórsetkender ýniversitette tegin oqý múmkindigine ie bolady.
Ortalyq kommýnikatsiialar qyzmetinde Qorǵanys ministriniń keńesshisi Aigúl Tólembaeva merzimdi áskeri qyzmetti ótkergen azamattarǵa arnalǵan jeńildetilgen bilim berý bastamasyna toqtaldy, dep habarlaidy Sputnik Qazaqstan.
Ol 2022 jyly Qorǵanys ministrligi áskeri boryshyn ótep shyqqan sarbazdarǵa bilim berý jeńildikterin usyný bastamasyn kóterip, bul baǵytta úlken jumys atqarǵanyn atap ótti.
"Merzimdi áskeri qyzmetin ótkergen jastar kúntizbelik bir jyl ishinde aqyly negizde elimizdiń barlyq joǵary oqý ornyna túse alady. Bul rette olardyń UBT baly eskerilmeidi. Tiisti ózgerister Ǵylym jáne joǵary bilim ministriniń buiryǵymen bekitiletin tiptik qabyldaý erejelerine engizildi. Bul erejeler Ádilet ministrliginde kelisýden ótken, qazir tirkeý satysynda tur", - dedi Tólembaeva baspasóz máslihatynda.
Al jaýyngerlik daiarlyq barysynda úzdik nátije kórsetken sarbazdar ýniversitet usynatyn 100% jeńildikti alady. Iaǵni oqý ornynda tegin oqidy. Qazir 40 joǵary oqý ornymen osyndai kelisim bekitilgen. Olar tegin bilim alý úshin 3 myńǵa jýyq oryn usynyp otyr. Budan bólek, áskeri boryshyn ótep kelgender joǵarǵy oqý oryndardyń áskeri kafedralarynda emtihansyz tegin oqi alady.
"Áskeri qyzmetin ótkergennen keiin olar zapastaǵy qatardaǵy jaýynger bolady. Al eger ofitserlik shen alǵysy kelse, áskeri kafedraǵa túsip, zapastaǵy leitenant atanady. Bir mańyzdy jańalyq – merzimdi áskeri qyzmetin ótegen jáne joǵary nátije kórsetken jastar konkýrstyq irikteý negizinde Qorǵanys ministrliginiń áskeri oqý oryndaryna emtihan tapsyrmai túsýge múmkindik alady", - dedi Tólembaeva.
Qorǵanys ministri keńesshisiniń aitýynsha, mundai jeńildikterge ie bolý úshin sarbazdar HQKO-dan merzimdi áskeri qyzmetten ótkeni týraly anyqtama alyp, áskeri bilettiń kóshirmesimen birge joǵary oqý ornyna tapsyrýǵa tiis.
