Baiqońyr ǵarysh ailaǵynda «Soiýz MS-12» TBK iske qosý naýqany barysynda Qazaqstan Respýblikasynyń Tsifrlyq damý, qorǵanys jáne aeroǵarysh ónerkásibi ministri Asqar Jumaǵaliev «Roskosmos» korporatsiiasynyń Bas direktory Dmitrii Rogozinmen kezdesti. Bul týraly atalmysh ministrlikke silteme jasap QazAqparat habarlaidy.
Kelissózge sondai-aq Baiqońyr qalasy ákimshiliginiń basshysy Konstantin Býsygin jáne Qyzylorda oblysynyń ákimi Qyrymbek Kósherbaev qatysty.
Kezdesýde «Baiqońyr» keshenindegi jáne jalpy ǵarysh salasyndaǵy yntymaqtastyqqa arnalǵan keń aýqymdy máseleler qaraldy. Atap aitqanda, taraptar «Báiterek» ǵarysh zymyran keshenin qurý jónindegi jobany iske asyrý boiynsha jumystardyń barysyn talqylady jáne 2022 jyly onyń ushý synaqtaryna shyǵatyn odan ári birlesken is-qimyl tártibin kelisti. Taraptardyń nazary jobanyń kommertsiialyq tartymdylyǵyn qamtamasyz etýdiń mańyzdylyǵyna da aýdaryldy.
Kezdesýde sondai-aq taraptar múddesinde odan ári paidalaný maqsatynda Gagarin startyn jańǵyrtý jobasyn BAÁ-men birlesip úsh jaqty iske asyrý, One Web baǵdarlamasy boiynsha iske qosý qyzmetterin júzege asyrýda Resei men Qazaqstannyń múddeli memlekettik organdary men uiymdarynyń ózara is-qimyly máseleleri qaraldy.
Kezdesý barysynda delegatsiialar Baiqońyr qalasynyń damý perspektivasy men problemalyq máselelerin sheshýge, onyń turǵyndarynyń laiyqty turǵyn úi-kommýnaldyq jáne áleýmettik-saiasi jaǵdailaryn qamtamasyz etýge baǵyttalǵan birlesken sharalardy talqylady. Atap aitqanda, biznesti damytý, halyqtyń jumyspen qamtylýy úshin qolaily jaǵdai jasaýǵa múmkindik beretin "Baiqońyr" erkin ekonomikalyq aimaǵyn (EEA) qurý jónindegi jumys tobyn qurý týraly sheshim qabyldandy.
Delegatsiia basshylary «Baiqońyr» kesheni jónindegi Resei-Qazaqstan úkimetaralyq komissiiasy qyzmetiniń tiimdiligin joǵary baǵalady jáne aǵymdaǵy jyldyń sáýir aiynda Máskeýde onyń altynshy otyrysyn ótkizý týraly aldyn ala kelisim jasaldy.
